АҚШ президенти Дональд Трамп агар Россия президенти Владимир Путин Украинадаги урушни тўхтатиш бўйича музокаралар олиб боришдан бош тортса, Россияга нисбатан санкциялар (қандайлиги ҳақида сўз бормади) жорий этиши мумкинлигини маълум қилди, деб хабар бермоқда Reuters.
«Биз Зеленский билан гаплашмоқдамиз, тез орада президент Путин билан ҳам гаплашамиз», — деди Трамп. АҚШ президенти Путин билан «жуда тез муддатда» гаплашишни режалаштираётганини маълум қилди. Россия президенти билан учрашув ҳақида гапираркан, Трамп исталган вақтда музокаралар олиб боришга тайёрлигини билдирди.
Ўз нутқида Трамп агар у президент лавозимида қолганида, Россия ҳеч қачон Украинага ҳужум қилмаган бўлишини яна бир бор таъкидлади. «Мен Путин билан жуда яхши муносабатда эдим. Бунақаси ҳеч қачон, ҳеч қачон бўлмасди. У Байденга ҳурматсизлик қилди. Жуда осонликча. У одамларни ҳурмат қилмайди. У ақлли. У тушунади. У Байденни ҳурмат қилмайди», — деди Трамп.
АҚШ президенти маъмурияти Украинага қурол юбориш масаласини ўрганаётганини қўшимча қилди, аммо Европа Иттифоқи Украинани қўллаб-қувватлаш учун кўпроқ иш қилиши кераклигини таъкидлади.
Трамп, шунингдек, ХХР раиси Си Цзиньпинга «босим ўтказиб», уни жараёнга аралашиб, Россия-Украина урушини тўхтатишга чақирганини, аммо Хитой раҳбари «бунинг учун кўп нарса қилмагани»ни айтди. «Унинг ҳам биз каби кучи кўп. Мен: «Сиз буни ҳал қилишингиз керак», дедим. Биз буни муҳокама қилдик», — деди Трамп.
Трамп маъмурияти у президентлик лавозимига киришишидан олдин Владимир Путин билан музокараларга тайёргарлик кўришни бошлаганди. Музокаралар қаерда ва қачон ўтказилиши номаълум. Аввалроқ Швейцария ва Сербия АҚШ ва Россия президентларини қабул қилишга тайёрлигини билдирган.
