Вазирлар Маҳкамасида 20 январь куни «Ўзбекистон Республикасида маҳсулот ва хизматларни ихтиёрий экологик маркировкалаш тизимини такомиллаштириш чора-тадбирлари тўғрисида»ги қарор қабул қилинди.
Ҳужжат билан мамлакатда ISO 14024 халқаро стандарти асосида бутун ҳаётий давр бўйича (I тип) «Яшил белги» маҳсулот ва хизматларни ягона ихтиёрий экологик маркировкалаш тизими жорий этилади.
Маҳсулот ва хизматларнинг экологик маркировкалаш стандартларига мувофиқлигини экологик маркировкалаш тизимида авторизациядан ўтган юридик шахслар баҳолайди. Экология вазирлиги «Яшил белги» тизимини тартибга солиш бўйича ваколатли органи ҳисобланади ҳамда унга бир қанча вазифалар юкланмоқда.
Хусусан, вазирлик экологик маркировкалаш тизимини тартибга солиш ҳужжатларини, шу жумладан, қоидалари, хорижий экологик маркировка тизимларини тан олиш ҳамда экологик маркировка белгисини қўллаш тартибларини тасдиқлайди. Шу билан бирга, экологик маркировкалаш органларига қўйиладиган талаблар белгилайди ҳамда уларни авторизациядан ўтказади.
Экология вазирлиги ҳузуридаги «Давлат экологик сертификатлаштириш ва стандартлаштириш маркази» масъулияти чекланган жамияти экологик маркировкалаш тизимининг оператори этиб белгиланди ҳамда унга қуйидаги вазифалар юкланди:
- экологик маркировкалаш органларини экологик тизимида авторизациядан ўтказиш;
- экологик маркировкалаш стандартларини амалиётга татбиқ этиш;
- маҳсулот ва хизматларга берилган экологик маркировкалаш сертификатининг ҳақиқийлиги ва амал қилиш муддатлари тўғрисидаги маълумотларни тасдиқлаш ҳамда очиқлигини таъминлаш мақсадида ушбу сертификатлар реестрини юритиш;
- экологик маркировкалаш органлари манфаатларини ҳимоя қилиш бўйича экологик маркировка белгисидан тўғри фойдаланилишини оммалаштириш ҳамда унинг халқаро миқёсдаги нуфузини ошириш;
- халқаро экологик сертификатлаштириш ва стандартлаштириш ташкилотлари, уюшмалар ва ишчи гуруҳларда экологик маркировкалаш тизимини тақдимот қилиш;
- экологик маркировкалаш органлари мутахассислари малакасини ошириш ва уларнинг халқаро экологик сертификатлаштириш ҳамда стандартлаштириш ташкилотларида тажриба алмашишини ташкил этиш.
«Spot»нинг тушунтиришича, вазирлик стандартларни белгилаши ва унга мувофиқ экологик жиҳатдан афзал, ресурсларни тежовчи, кам чиқитли ва чиқиндисиз, атроф-муҳитга салбий таъсири камайтирилган маҳсулотларни ишлаб чиқаришни рағбатлантиришга қаратилган таклифларни ишлаб чиқиши ва киритиши керак.
Шунингдек, ҳужжат билан экологик маркировка белгиси тасдиқланди. Белги оқ фонда тўқ яшил ва оч яшил ранглардаги сўзлардан иборат. Улар оч яшил рангдаги тўртбурчак шакл ичида жойлаштирилган.
