Тошкент вилояти Бўстонлиқ туманида янги «Чиноркент» темирйўл бекати қуриб битказилди. Бу ҳақда «Тошкент минтақавий темирйўл узели» компанияси матбуот хизмати хабар қилди.
Таъкидланишича, Хўжакентдан Чиноркентгача 1,5 км масофага темирйўл қурилди, шунингдек, «Чиноркент» темир йўл бекати қуриб битказилди ҳамда 22 январь куни фойдаланишга топширилди.
Бу ерда 150 м узунликда перрон ҳамда соябон қурилиб, имконияти чекланган йўловчилар учун сирғанишга қарши плиталар ўрнатилди ҳамда йўловчилар учун ер ости туннели барпо этилди.
Эндиликда Тошкентдан йўлга чиққан йўловчилар электропоездда Чорқов шаҳарчасида яқинида жойлашган «Чиноркент» темир йўл бекатига етиб келиши мумкин.
Эслатиб ўтамиз, 2024 йил декабрь ойида ушбу йўналишда янги электропоезд қатнови йўлга қўйилганди. Поездда йўл ҳақи катталар учун 20 минг сўм, болалар учун 11,5 минг сўм. Саёҳат учун АТТО саёҳат картаси (жамоат транспортида саёҳат қилиш учун ишлатилади) орқали тўлаш ёки онлайн чипта харид қилиш мумкин.
Янги электропоезд билан «Газета.uz»нинг фоторепортажида танишишингиз мумкин.
