Таниқли актёр, Ўзбекистон Киноарбоблари ижодий уюшмаси раиси Матёқуб Матчонов Кинематография агентлиги биносида фуқарони ҳақорат қилгани учун жаримага тортилди. «Газета.uz» суд ҳужжати билан танишди.
Ҳужжатга кўра, Матёқуб Матчонов 2025 йил 15 январь куни Кинематография агентлиги биносида бўла туриб, таниши Э.Юлдашевни ўтказилаётган тадбирга халақит бериши важи билан бинога киритмаслиги юзасидан келишмовчилик келиб чиққан. Натижада актёр Э.Юлдашевни турли сўзлар билан ҳақорат қилиб, унинг шаъни ва қадр-қимматини қасддан камситган.
Ҳуқуқбузар Матёқуб Матчонов суд мажлисида Э.Юлдашевни анча йиллардан буён таниши ва унинг аризасига асосан, Кинематография агентлигида текшириш ишлари олиб борилаётганини маълум қилган. Э.Юлдашев ўз аризасида Матчоновни Бадиий кенгаш аъзоси сифатида давлат буюртмаси асосида тасвирга олинган киноларда рол ижро этгани ва бу манфаатлар тўқнашуви эканини кўрсатиб ўтган.
Матёқуб Матчоновнинг сўзларига кўра, 15 январь куни Э.Юлдашев Кинематография агентлигига келганида, қоровуллар уни ичкарига киритмаган ва ўртада тортишув юз берган. Бу вазиятни кўрган Матёқуб Матчонов у билан аризасида кўрсатилган ҳолатлар бўйича гаплашиб олмоқчи бўлган, Э.Юлдошевни анча йиллардан бери танигани сабабли унга гапирган. Ўша куни агентлик павильонида таниқли бир операторнинг ижодига бағишланган тадбирга тайёргарлик кўрилаётганлигини айтиб, ичкарига кириб кетган. Ўша куни тушдан сўнг Э.Юлдашев яна агентликка келиб, қоровуллар билан тортишган. Матёқуб Матчонов тадбирга ҳалал бермаслиги учун унга бу ердан чиқиб кетишини айтиб, жаҳл устида Э.Юлдашевни ҳақорат қилган.
Судда Матёқуб Матчонов мазкур ҳолат бўйича ундан кечирим сўраши, вазият бунчалик бўлиб кетишини билмагани айтган. У Э.Юлдашевни укасидек кўриб, унга ҳазил қилган пайтлари бўлгани, унинг ариза ёзиши хаёлига ҳам келмагани, шу сабабли жаҳли чиққанини айтиб, суддан енгиллик беришни сўраб кўрсатувлар берган.
Суд мажлисида сўралган жабрланувчи Э.Юлдашев Кинематография агентлигининг молиявий фаолиятидаги камчиликларни ўрганиш мақсадида Бош прокуратурага ариза билан мурожаат қилгани, ўрганиш шаффоф бўлиши учун у ҳам агентликка келгани, лекин агентлик раҳбари уни бинога киритмасликка ҳаракат қилганини айтган.
Унинг қўшимча қилишича, 15 январь куни қоровуллар уни ичкарига киритмаган, шу пайт Матёқуб Матчонов кўриб қолиб, аризаси юзасидан сўраган ва уни ҳақорат қилган. Э.Юлдашев ушбу суҳбатни телефон аппаратида диктофонга ёзиб олган ва ИИБга хабар берган.
22 январь куни Тошкент шаҳар жиноят ишлари бўйича Чилонзор туман суди қарори билан Матёқуб Матчонов Маъмурий жавобгарлик тўғрисидаги кодекснинг 41-моддасида (ҳақорат қилиш) назарда тутилган маъмурий ҳуқуқбузарликни содир этган деб топилган. Унга БҲМнинг уч баравари (1 миллион 125 минг сўм) миқдорида жарима жазоси тайинланган.
Эслатиб ўтамиз, 2023 йил март ойида Сирдарё вилоятининг Гулистон шаҳрида «Конституция ўзимизники» тарғибот тадбирида сўзга чиққан Матёқуб Матчонов қамоқда ўтказган кунларини ёдга олиб, у ердаги кунларини душманига ҳам раво кўрмаслигини айтган эди. 2016 йилда Матчонов раҳбарлик қиладиган тижорат ташкилотига солиқларни тўлашдан бўйин товлаш, савдо қоидаларини бузиш каби айбловлар қўйилган ва у қамалган эди. Актёр ўша йилнинг октябрь ойида амнистия билан озодликка чиқарилган.
У 2018 йилдан буён Киноарбоблар ижодий уюшмаси раиси сифатида фаолият юритиб келмоқда.
