Бухорода яшаган 33 ёшли аёл туғуруқхонада вафот этгани ҳақида хабар тарқалди. Вилоят Соғлиқни сақлаш бошқармаси ҳолат юзасидан муносабат билдирди.
Маълум қилинишича, 1992 йилда туғилган фуқаро З.О. 2024 йилнинг 12 декабрь куни Бухоро вилояти перинатал марказига қабул қилинган. Ўшанда аёлда кучли шамоллаш аломатлари: йўтал, тана ҳароратининг 38 даражагача кўтарилиши, қоғоноқ сувларининг кетиши, умумий ҳолсизлик ҳолатида бўлган.
Беморда ушбу ҳомиладорлик камқонлик фонида кечган. Ҳомиладорликнинг 14 ҳафталик муддатида, яъни 14 июнь куни жигар эхинококи ташхиси билан оператив даволанган. Керакли барча клиник лаборатор, инструментал текширувлар ўтказилган. Керакли мутахасислар консультацияси ўтказилган.
ССБ хабарида консилиум асосида стандартларга кўра керакли даво буюрилган, кузатув давом эттирилгани айтилади. Аёлда туғруқ миллий стандарт асосида олиб борилган, оператив туғруққа кўрсатма бўлмаган.
13 декабрь куни соат 7:00 да тана ҳароратининг 38 даражагача кўтарилиши кузатилган. Паратсетамол дориси берилган. Келишилган шифокорлар консилиумидан кейин тор мутахасислар пульмонолог ва жаррох шифокор кўруви ташкил қилинган. Соат 12:30 да эса мунтазам туғуруқ дардлари бошланган.
Соат 14:25 га келиб жадаллашган туғуруқ содир бўлган. Қиз жинсли чақалоқ 4 кило 100 грамм оғирликда дунёга келган. Аёл бир вақтда 250 млн қон йўқотган, унда бачадон гипотонияси кузатилган. Беморда нафас етишмовчилиги бошланиб, терисининг ранги оқара бошлаган.
Бемор кўрсатма асосида сунъий нафас аппаратига уланган ва интенсив реанимацион чора-тадбирлар бошланган. Беморда кардиомониторда юрак фибриляцияси аниқланган. Пульс периферияда аниқланмаган. Юрак фаолиятини тиклаш мақсадида дефибриляция ва юрак бевосита массажи қилинган.
15:05 да бемор аҳволи оғирлашиб, нафас етишмовчилиги, тери цианози кучайган. Кўз қорачиғи кенгайган, ёруғликка реакция кузатилмаган. 40 дақиқа давомида ўтказилган ўпка-юрак реанимацион чора-тадбирлари натижасида ҳам юрак фаолияти тикланмаган. Аёлда соат 15:15 да биологик ўлим қайд қилинган.
Марҳума суд тиббиёт экспертизасидан ўтказилди ва ўлим сабаби қоғоноқ сувлари эмболияси тасдиқланган. Ҳолат юзасидан Бухоро давлат тиббиёт институтининг профессор-мутахассислари иштирокида хизмат текшируви ўтказилган ва Республика ихтисослаштирилган она ва бола саломатлиги илмий-амалий тиббиёт марказининг мутахассислари иштирокида чуқур муҳоқама қилинган.
Тиббий ҳужжатлар юритилишида хато ва камчиликларга йўл қўйган ходимлар — марказ 2-туғуруқ бўлими мудири С.Рабиевга ҳамда даволовчи акушер-гинеколог З. Мусиновага ўртача ойлик маошидан 30 фоиз жарима қўлланилиб, бошқа бўлимга ротация қилинган.
