Колумбия АҚШ президенти Дональд Трамп мамлакатга қарши санкциялар ва савдо тарифлари жорий этиш билан таҳдид қилганидан сўнг, АҚШдан депортация қилинган ноқонуний муҳожирларни қабул қилишга рози бўлди, деб хабар бермоқда CNN.
«Колумбия ҳукумати президент Трампнинг барча шартларига, шу жумладан, Колумбиядан АҚШга қайтган барча ноқонуний мигрантларни, хусусан, АҚШ ҳарбий самолётларида чекловларсиз ёки кечикишларсиз қабул қилишига рози бўлди», — маълум қилди Трамп маъмурияти.
Якшанба куни эрталаб Колумбия президенти Густаво Петро депортация қилинган Колумбия фуқароларини олиб кетаётган АҚШнинг иккита ҳарбий самолётини қабул қилишдан бош тортганидан сўнг, икки давлат ўртасида савдо уруши бошланишига сал қолди. Унинг сўзларига кўра, АҚШ колумбиялик муҳожирларга «қадр-қиммат ва ҳурмат» билан муносабатда бўлиши керак.
«Мигрант жиноятчи эмас ва инсонга муносиб муносабатда бўлиши керак. Шунинг учун мен Америка ҳарбий самолётларини жойлаштирдим… Мен муҳожирларни улар истамаган давлатда қолишга мажбур қила олмайман; лекин агар бу давлат уларни қайтариб юборадиган бўлса, буни уларга ва мамлакатимизга қадр-қиммат ва ҳурмат билан қилиш керак. Биз ватандошларимизни фуқаролик самолётларида қабул қиламиз», — деб ёзди Петро Х’да.
Бунга жавобан Трамп АҚШ зудлик билан Колумбиядан импорт қилинадиган барча маҳсулотларга 25 фоизлик божлар жорий этишини ва бир ҳафта ичида уларни 50 фоизга оширишини айтди. Шунингдек, у мамлакатга қарши молиявий санкциялар қўллаш ва Колумбия раҳбариятига визалар беришни тақиқлаш билан таҳдид қилган.
Петро бу таҳдидларга ижтимоий тармоқлардаги узун пости билан жавоб берди, унда Трампни колумбияликларга паст ирқ сифатида қараганликда ва очкўзлик туфайли бутун инсониятни йўқ қилишга тайёрликда айблади. Шунингдек, у АҚШ блокадасидан қўрқмаслигини таъкидлади ва Америка импортига ҳам худди шундай божлар жорий этишга ваъда берди.
Бироқ якшанба куни кечқурун Оқ уй икки давлат келишувга эришганини эълон қилди. Трамп маъмурияти божлар ва санкциялар тўғрисидаги фармонлар тайёр эканини ва агар Колумбия келишувга риоя қилишдан бош тортса, имзоланишини айтди. Колумбия фуқаролари ва юк кемаларига нисбатан виза санкциялари ва божхона текширувлари депортация қилинган колумбияликларнинг биринчи самолёти қўнгунга қадар ўз кучида қолади.
«Бугунги воқеалар яққол кўрсатиб турибдики, Америка яна ҳурматга сазовор. Президент Трамп дунёдаги бошқа барча давлатлардан АҚШда ноқонуний бўлиб турган фуқароларини депортация қилишда тўлиқ ҳамкорликни кутмоқда», — дейилади Оқ уй баёнотида.
Колумбия ташқи ишлар вазири Луис Хильберто Мурильо АҚШдан депортация парвозлари қайта бошланганини тасдиқлади. Унинг қўшимча қилишича, муҳожирларни олиб кетиш учун президент самолёти ҳам жўнатилади.
- АҚШ Колумбиянинг энг йирик савдо шериги ҳисобланади. Мамлакат Америка бозорига хом нефть, қаҳва ва узилган гулларни экспорт қилади. 2022 йилда икки давлат ўртасидаги товар айирбошлаш ҳажми 53,5 миллиард долларни ташкил этган.
- Колумбия АҚШдаги энг кўп ноқонуний мигрантларга эга давлатлар қаторига кирмайди, у Мексика, Сальвадор, Ҳиндистон, Гватемала ва Гондурасдан сезиларли даражада ортда, дея аниқлик киритади New York Times.
- Трамп маъмурияти Петро «фуқаролик» деб атаган самолётларнинг мунтазам парвозларига қўшимча равишда ҳарбий самолётларни ҳам жўнатмоқда. Ҳарбий парвозлар АҚШдан фақат мезбон давлат рухсат берган тақдирдагина учиши мумкин.
