АҚШ президенти Дональд Трамп Оқ уйдаги брифингда сўзлаган нутқида Вашингтонда American Airline самолёти ва Black Hawk вертолёти тўқнашуви оқибатида ҳеч ким омон қолмаганини тасдиқлади. Унинг сўзларини NBC News келтирмоқда.
Унинг айтишича, у ерда кенг кўламли қидирув-қутқарув операцияси ўтказилиб, барча мавжуд ресурслар жалб қилинган.
«Бу пойтахтимизда ва мамлакатимиз тарихида қоронғи ва изтиробли кеча бўлди, даҳшатли миқёсдаги фожиа. Биз фавқулодда биздан тортиб олинган ҳар бир қимматбаҳо жон ҳақида қайғурамиз», — деди Трамп.
Президент, ўз навбатида, америкаликларнинг ҳалокатдан кейин парвоз қилишдан хавотирланмаслиги кераклигини айтди, деб таъкидлади CBC News.
«Кўп йиллардан бери бундай ҳодиса содир бўлмаганди ва тўқнашув ҳеч қачон такрорланмаслигини кутиб қоламиз», — деди у ва ўзи учишдан иккиланмаслигини қўшимча қилди. «Учиш жуда хавфсиз. Бизда дунёнинг исталган жойи томон энг хавфсиз парвоз бор ва буни шундай сақлаб қоламиз», — дея қўшимча қилди президент.
- Америка авиакомпаниясининг йўловчи самолёти ва АҚШ армиясининг Black Hawk вертолёти ҳаводаги тўқнашувдан сўнг Потомак дарёсига қулади. Тўқнашув 29 январь куни кечқурун Вашингтондаги Рональд Рейган аэропорти яқинида содир бўлган. Самолёт бортида 64 киши бор эди: 60 йўловчи ва тўрт экипаж аъзоси. Вертолётда эса камида уч киши бўлгани айтилади.
- The Washington Post`нинг ёзишича, 2023 йилдан бери аэропорт ҳудудида ҳарбий вертолётларнинг самолётлар билан тўқнашиши мумкин бўлган бир нечта хавфли ҳолатлар содир бўлган.
- Ўзбекистон президенти ҳодиса юзасидан Дональд Трампга таъзия йўллади.
