Ўзбекистондаги халқаро ва давлат аҳамиятидаги автомобиль йўллари бўйларида Service point ва Service area объектлари ташкил этилади. Бу президентнинг мамлакатда транспорт-логистика тизимини ривожлантириш тўғрисидаги қарорида белгиланган.
Service point — автомобилларга ёқилғи қуйиш ҳамда электромобилларни қувватлантириш станциялари, умумий овқатланиш объектлари, дўконлар, техник сервис пунктлари, санитария-гигиэна шохобчалари.
Service area — Service point объектлари, TIR парк, мотеллар, автомобилларни ювиш шохобчалар ва wi-фи нуқталарини қамраб олади.
Service point ва Service area объектлари Транспорт вазирлиги, Давлат активларини бошқариш агентлиги ва Транспорт вазирлиги ҳузуридаги Автомобиль йўллари қўмитасининг умумий фойдаланишдаги автомобиль йўллари бўйларида ташкил этилади.
Service point ва Service area объектларини ташкил этишда ер участкалари ўрмон фонди ерлари ҳамда қишлоқ хўжалигига мўлжалланган ерлар тоифасидан саноат, транспорт, алоқа, мудофаа ва бошқа мақсадларга мўлжалланган ерлар тоифасига ўрнатилган тартибда ўзгартирилади.
Қарорга кўра, мамлакатдаги халқаро (3384 км) ва давлат аҳамиятидаги (14 316 км) автомобиль йўлларида жами 82 та шундай объектлар ташкил этилиши режалаштирилган.
Қарорда Транспорт вазирлиги Автомобил йўллари қўмитаси билан биргаликда икки ой муддатда қуйидагиларни назарда тутувчи норматив ҳуқуқий ҳужжат лойиҳасини Вазирлар Маҳкамасига киритиши белгиланган:
- Service point ва Service area объектлари ташкил этиладиган ер участкаларининг манзилли рўйхатини тасдиқлаш;
- автомобиль йўллари бўйида сервис объектларини мастер режалар асосида қуриб битказилган ҳолда тайёр бизнес шаклида электрон онлайн аукционга чиқариш тартибини белгилаш;
- халқаро ва давлат аҳамиятидаги автомобиль йўллари бўйларида Service point ва Service area объектларига қўйиладиган талабларни белгилаш.
