АҚШ президенти Дональд Трамп 1 февралдан Канада, Хитой ва Мексикадан олиб келинаётган товарларга божларни жорий қилмоқда. Бу ҳақда Оқ уй матбуот котиби Кэролайн Ливитт хабар берди, деб ёзмоқда CNN. У янги тарифлар қандай амалга оширилиши ҳақида батафсил маълумот бермаган.
Канада ва Мексика учун бож миқдори 25%, Хитой учун 10% ни ташкил этади.
Канада бош вазири Жастин Трюдо Канада АҚШ жорий қилган ҳар қандай божларга «кучли, аммо оқилона» жавоб чораларини кўришини айтди. Шу билан бирга, у мамлакат аҳолиси оғир вақтларга тайёр бўлиши кераклигини таъкидлади.
«Мен вазиятга бўёқ беришни истамайман — яқин кунлар ва ҳафталарда мамлакатимиз қийин даврларга дуч келиши мумкин. Канадаликлар ташвиш ва хавотирда бўлиши мумкинлигини биламан, лекин улар федерал ҳукумат уларни қўллаб-қувватлашини билишини хоҳлайман», — дея Трюдонинг сўзларини келтирмоқда The Guardian.
Канада экспортининг 75 фоизи АҚШга тўғри келади.
Reuters манбаларининг таъкидлашича, Трамп божларни жорий этишни 1 мартгача кечиктириши мумкин. «Мен бу хабарларни кўрдим, бу ёлғон», — дея изоҳ берди Оқ уй матбуот котиби. Дам олиш кунлари Флоридадаги мулкида ишлаётган Трамп АҚШнинг энг яхши учта савдо ҳамкори тарифларнинг олдини олиш учун ҳеч нарса қила олмаслигини айтди, деб ёзади Reuters.
The Guardian нашрининг таъкидлашича, Канада ва Мексика аллақачон АҚШга қарши жавоб чораларини ишлаб чиққан, бу эса «ҳалокатли савдо уруши эҳтимолини оширади».
Шу ҳафта бошида Трамп америкалик истеъмолчилар Шимолий Америкадаги икки қўшниси импортига таяниши ҳақидаги фикрни рад этганди, деб таъкидлайди CNN. «Бизга улар эгалик қиладиган нарсалар керак эмас», — деган Трамп Канада ва Мексикага ишора қилиб.
Мексика президенти Клаудия Шейнбаум ҳам жавоб қайтаришини билдирди, бироқ у Трампнинг тариф қарорини «хотиржамлик билан қабул қилишини» ва у билан чегара мулоқотини давом эттиришга тайёрлигини айтди.
Хитой эса ўз савдо манфаатларини ҳимоя қилишга ваъда берди. Хитой Трампнинг бу ҳаракатларига «қатъиян қарши», дея қўшимча қилди Пекиннинг Вашингтондаги элчихонаси матбуот котиби: «На томонлар, на дунё манфаатларига хизмат қиладиган бундай савдо ёки тариф урушида ғолиб йўқ».
Иқтисодчиларнинг фикрича, чекланган шароитларда тарифлар иқтисодий ўсишнинг самарали воситаси бўлиши мумкин. Трамп тарифлардан учта асосий мақсадда фойдаланишга ваъда берган: даромадни ошириш, савдони мувозанатга келтириш ва рақобатчи мамлакатларни музокаралар столига олиб келиш.
Трамп ноябрь ойидаёқ Хитой, Мексика ва Канададан келадиган товарларга бож жорий этиш учун барча зарур ҳужжатларни имзолаши ҳақида гапирганди. У буни Мексика АҚШга келаётган ноқонуний муҳожирларни, Канада эса АҚШга гиёҳванд моддалар, хусусан, фентанил оқимини тўхтатиши кераклиги билан изоҳлаган. Хитойдан эса АҚШга жуда кўп миқдорда гиёҳванд моддалар, хусусан, фентанил келаётгани қайд этилган.
