Қўшма Штатлар Украинада сайловлар ўтказилишини истайди, айниқса, агар Киев яқин ойларда Россия билан сулҳ тузишга рози бўлса. Бу ҳақда президент Дональд Трампнинг Украинадаги юқори мартабали амалдори Reuters агентлигига хабар берди.
Трампнинг Украина ва Россия бўйича махсус вакили Кит Келлог интервьюда Россия билан уруш даврида тўхтатилган Украина президенти ва парламент сайловлари «ўтказилиши керак»лигини айтди.
«Аксарият демократик давлатларда уруш даврида сайловлар бўлиб ўтади. Менимча, бу жуда муҳим, бу демократия учун яхши. Мустаҳкам демократиянинг гўзаллиги шундаки, сизда бир нечта номзод бўлади», — деди Келлог.
Трамп ва Келлогнинг иккиси ҳам 2022 йил февраль ойида Россиянинг кенг кўламли босқини билан бошланган урушни тугатиш учун янги маъмуриятнинг дастлабки бир неча ойларида келишув тузиш режаси устида ишлаётганликларини билдирди.
Улар Европада Иккинчи жаҳон урушидан кейинги энг ҳалокатли можарони тугатиш стратегияси ва бундай режани қачон ошкор қилишлари ҳақида жуда кам маълумот берган, деб таъкидлайди Reuters.
Агентликка кўра, Трампнинг режаси ҳали ҳам ривожлантириб борилмоқда ва сиёсий қарорлар қабул қилинмаган, аммо Келлог ва Оқ уйнинг бошқа расмийлари сўнгги кунларда Украинани Россия билан дастлабки сулҳ доирасида сайловларга рози бўлишга ундашни муҳокама қилди, бу суҳбатлардан хабардор бўлган икки киши ва АҚШнинг собиқ амалдори сайлов таклифи ҳақида қисқача маълумот берди.
Қайд этилишича, агар Украинада президентлик сайловлари ўтказилса, ғолиб Москва билан узоқ муддатли келишув бўйича музокаралар олиб бориш учун жавобгар бўлиши мумкин.
Трампнинг бундай таклифи Киевда қандай кутиб олиниши номаълум. Президент Зеленскийнинг айтишича, агар жанглар тўхтаса ва Россияни жанговар ҳаракатларни давом эттиришдан тўхтатиш учун кучли хавфсизлик кафолатлари мавжуд бўлса, Украина бу йил сайловлар ўтказиши мумкин.
Манбаларнинг айтишича, Трамп маъмурияти ҳали Украинадан президентлик сайловларини йил охиригача ўтказишни расман сўрамаган.
- Ўтган йилнинг ноябрь ойида бир неча ОАВ Украинада президент сайлови учун «маълум тайёргарликлар» бошлангани, муҳокама қилинаётган сана — 2025 йил 25 май экани ҳақида ёзганди. Украина президенти офиси буни рад этган.
- Украинада президентлик сайлови 2024 йил 31 март куни ўтказилиши керак эди, бироқ мамлакатда ҳарбий ҳолат жорий қилингани сабабли бундай бўлмади. Зеленский 2024 йилнинг ноябрь ойида «ҳозир сайловлар вақти эмас», «ҳозир мудофаа вақти, жанг вақти» деганди. Украиналиклар ўртасида ўтказилган сўровлар шуни кўрсатдики, аҳолининг аксарияти уруш тугагунга қадар сайловларни ўтказишга қарши.
- 2025 йил январь ойида Зеленский «Украинада президентлик сайлови ҳарбий ҳолат тугаганидан сўнг дарҳол ўтказилади», — деганди. «Ёки парламент қонунчиликни ўзгартириши керак», — деган президент қонун уруш шароитида сайлов ўтказишни тақиқлашига ишора қилди ва жамият бунга қарши эканини билдирган.
