Тошкент ва Сурхондарё вилоятларида қаттиқ ва суюқ маиший чиқиндиларни йиғиш ва олиб чиқиш бўйича ягона тарифлар тасдиқланди. Бу ҳақдаги қарорлар халқ депутатлари вилоятлар кенгашлари томонидан санитария-тозалаш хизматлари сифатини ошириш мақсадида қабул қилинди, деб хабар берди Чиқиндиларни бошқариш ва циркуляр иқтисодиётни ривожлантириш агентлиги.
Тошкент вилоятининг аксарият туман ва шаҳарларида тариф ҚҚС билан бир кишига 7840 сўм миқдорида белгиланди (2023 йил ноябрь ойидан 4400 сўм, +1,8 баравар), юридик шахслар учун эса ҚҚС билан бир метр куб учун 82 880 сўм (68 320 сўм, +21,3%).
Тарифлар Тошкент вилоятидаги Toza Hudud давлат унитар корхонаси ҳамда Angren Bunyod Fayz, Nurli yo‘l marvaridi, Ohangaron sanitariya tozalash, Rahnamo Servis ва Zero-Waste компанияларига татбиқ этилади.
Улар қуйидаги ҳудудларга хизмат кўрсатади:
- Олмалиқ, Ангрен, Оҳангарон, Нурафшон, Чирчиқ, Янгийўл шаҳарлари;
- Оҳангарон, Бўстонлиқ, Зангиота, Қибрай, Қуйичирчиқ, Ўртачирчиқ, Юқори Чирчиқ, Паркент, Тошкент, Чиноз, Янгийўл туманлари.
Шунингдек, Сурхондарё вилоятининг барча шаҳар ва туманлари учун ягона тарифлар тасдиқланди. Жисмоний шахслар учун нарх бир киши учун 7000 сўмни (ҚҚС билан 7840 сўм), юридик шахслар учун 122 219 сўмни (ҚҚС билан 136 885 сўм) ташкил этади. Ўтган йилнинг апрель ойида тарифлар мос равишда 4500 ва 78 400 сўм бўлган, яъни ўсиш 74 фоизни ташкил этган.
Тарифлар Toza Hudud ДУК ва Bio Texno Eko, Bio Tex Eco, Qiziriq invest, Sale kingdom ва Sho‘rg‘un kommunal фойдаланиш компанияларига татбиқ этилади.
Агентлик маълумотларига кўра, ягона тарифлар мамлакат раҳбарияти қарорлари ижроси доирасида белгиланади. Таъкидланишича, мажбурий ягона тарифлар кўрсатилаётган санитария-тозалаш хизматлари сифатини оширишга, шунингдек, янги иш ўринларини яратишга қаратилган.
2023 йилнинг ноябрь ойида Тошкент, Фарғона, Андижон, Самарқанд вилоятлари ва Самарқанд шаҳрида, ўша йилнинг декабрь ойида эса Бухоро ва Наманган вилоятларида чиқиндиларни олиб чиқиш бўйича ягона тарифлар белгиланган эди.
Ўтган йилнинг декабрь ойида Ўзбекистон Қонунчилик палатаси маиший чиқиндиларни олиб чиқиб кетиш учун қарздорлик мавжуд бўлганда электр энергияси учун тўловни чеклаш тўғрисидаги қонунни қабул қилди. Депутатлар тузатишларни фаол муҳокама қилди ва натижада чекловлар киритилгунга қадар қарзни тўлаш учун 5 кун вақт беришга қарор қилди. Ҳужжат Сенатга юборилган.
