Мексика ва АҚШ президентлари Клаудия Шейнбаум ҳамда Дональд Трамп Мексика товарларини АҚШга импорт қилишда 25 фоизли бож тўловлари жорий этишни кечиктириш бўйича келишувга эришди. Бу ҳақда Мексика етакчиси ўзининг X саҳифасида маълум қилди.
Шейнбаумнинг сўзларига кўра, икки президентнинг «яхши кечган» шахсий суҳбати натижасида келишувга эришилди. Муддат бир ойга кечиктирилади. Мексика, ўз навбатида, АҚШ билан чегарада гиёҳванд моддалар контрабандасига қарши курашни кучайтириш учун 10 минг нафар Миллий гвардия ходимини юборади.
Шейнбаумнинг маълум қилишича, АҚШ ва Мексика расмийлари 3 февралдан хавфсизлик ва икки томонлама савдо масалалари бўйича биргаликдаги ишларни бошлайди.
Келишув, шунингдек, АҚШнинг Мексика томон қуроллар савдосининг олдини олиш бўйича ҳаракат қилиш мажбуриятини ўз ичига олади.
«Мен Президент Шейнбаум билан музокараларда иштирок этишни интиқлик билан кутаман, чунки биз мамлакатларимиз ўртасида «битим»га эришишга ҳаракат қиламиз», деб ёзди Трамп ўзининг Truth Social тармоғида.
«Биз мазкур бир ой ичида ишлашимиз ва бир-биримизни бу энг яхши йўл эканига ишонтиришимиз керак», — деди Шейнбаум матбуот анжуманида.
- Трамп 2 февраль куни Канада ва Мексикадан товарлар импортига 25 фоизлик бож жорий этилишини эълон қилганди. Шу билан бирга, у Хитойдан келадиган товарларга 10% бож жорий этди. Ушбу ҳаракатлар «Мексика, Канада ва Хитойни ноқонуний иммиграцияни тўхтатиш ва заҳарли фентанил ва бошқа гиёҳванд моддалар оқимини тўхтатиш ҳақидаги ваъдаларини бажаришга мажбур қилиш» зарурати билан изоҳланган.
- Мексика президенти бунга жавобан ўз иқтисодиёт вазирига жавоб чораларини, жумладан, тариф чораларини кўришни топширганди.
