Ўзбекистонда пиллачилик соҳасида банд бўлган фуқаролар ҳақидаги маълумотлар «yangiish.mehnat.uz» платформасига киритилади. Бу ҳақда Вазирлар Маҳкамасида 29 январь куни қабул қилинган «Пиллачилик соҳасида аёлларни босқичма-босқич иш билан таъминлаш чора-тадбирлари тўғрисида»ги қарорда сўз боради.
Ҳужжатда таъкидланишича, президентнинг 2024 йил май ойида тегишли фармонига мувофиқ, 2027 йилга қадар пиллачилик соҳасида мавсумий бандликни 2 миллион кишига етказиш режалаштирилган.
Оила ва хотин-қизлар қўмитаси пиллачилик кластерлари билан биргаликда ишсиз аёлларни ипак қурти етиштириш агротехникаси ва уни қайта ишлаш кўникмаларини ўргатиш курсларига жалб қилмоқда.
Бунда ушбу курсларни муваффақиятли тамомлаган шахсларнинг бандлиги 105 минг гектар ер майдонида янги тут плантацияларини барпо этиш ва далалар четига янги тут кўчатларини экиш ҳисобидан устувор тартибда таъминланади.
Ўқув курсларини видеоконференсалоқа орқали ўтказишда иштирок этиш учун Хитой, Вьетнам, Ҳиндистон, Япониядан пиллачилик мутахассисларини таклиф этиш режалаштирилмоқда.
Юқорида қайд этилганидек, соҳада банд бўлганлар ҳақидаги маълумотлар «yangiish.mehnat.uz» платформасига киритилади. Шу ерда курсларда таълим олган ва доимий ҳамда мавсумий ишга қабул қилинган аёллар сони ҳисобга олинади.
Камбағалликни қисқартириш ва бандлик вазирлиги ҳамда Солиқ қўмитаси асосий параметрларга мувофиқ пиллачилик соҳасида қисқа муддатли ўқув курсларини тамомлаган хотин-қизларнинг доимий ва мавсумий ишларга қабул қилингани ҳисобини ҳам шу платформа орқали юритади.
Ҳужжат билан қуйидагилар тасдиқланган:
- Аёлларни пиллачилик бўйича қисқа муддатли курсларда ўқитиш ва соҳага жалб қилишнинг асосий параметрлари;
- Аёлларни пиллачилик соҳасида қисқа муддатли ўқув курсларида ўқитишни ташкил этиш бўйича «йўл харитаси».
Қишлоқ хўжалиги вазирлиги икки ой муддатда:
- Камбағалликни қисқартириш ва бандлик вазирлиги билан биргаликда ипак қурти парвариши билан шуғулланувчи касаначиларнинг ижтимоий дафтарларда бўлиши ҳамда ушбу фуқароларнинг ижтимоий нафақаларини сақлаш тартиблари юзасидан таклифларни Вазирлар Маҳкамасига киритади;
- Инвестициялар, саноат ва савдо вазирлиги билан биргаликда Ўзбекистон шароитига мос, чидамли ва унумдорлиги юқори маҳаллий ипак қурти зотларини яратиш учун хорижий грантларни жалб қилиш;
- Ташқи ишлар вазирлиги билан биргаликда ипак саноати ривожланган хорижий давлатларнинг тадбиркорлик бирлашмалари (уюшмалари) билан ўзаро ҳамкорлик алоқаларини ўрнатиш чораларини кўради.
Эслатиб ўтамиз, президент Шавкат Мирзиёев 2024 йил 10 май куни чарм ва ипак саноатини ривожлантириш, аҳоли бандлигини таъминлаш масалаларига бағишланган йиғилиш ўтказганди.
Ўшанда давлат раҳбари пиллачиликдаги энг долзарб муаммо озуқа таъминоти бўлиб қолаётганини таъкидлаган. Бу муаммони ҳал қилиш учун тутнинг янги серҳосил навларини экишни кенгайтириш зарур. Пахта майдонлари четига бир-икки қатордан тут экилса, қўшимча озуқа манбаи яратилиши мумкин, деди президент.
Йиғилишда ҳокимларга янги тутзорлар ташкил қилиш учун 105 минг гектар ер ажратиш топширилганди. Бу ерлар лотларга бўлиниб, аукцион орқали аҳолига берилиши, аукционда ернинг бошланғич нархи 10 фоиз этиб белгиланиши қайд этилган. Банд бўлмаган аҳоли, жумладан, аёллар мономарказлар ва пиллачилик кластерларида қисқа курсларда ўқитилиши ҳам таъкидланган.
