Президент Дональд Трампнинг айтишича, АҚШ урушдан вайрон бўлган Ғазо секторини эгаллайди ва фаластинликлар бошқа жойга кўчирилгандан сўнг уни иқтисодий жиҳатдан ривожлантиради. Бу ҳақда Трампнинг сўзларига таяниб, CNN ва Reuters хабар бермоқда.
Трамп АҚШда 4 февраль, сешанба куни Исроил бош вазири Биньямин Нетаньяҳу билан бўлиб ўтган қўшма матбуот анжуманида ўзининг кутилмаган режасини маълум қилди.
Бу эълон Трампнинг бир муддат аввал билдирилган, Ғазодаги фаластинликларни қўшни давлатларга доимий яшаш учун кўчириш бўйича (хусусан, Миср ва Иорданияга — таҳр.) таклифидан сўнг амалга оширилди, у анклавни «бузиш майдони» деб атади.
Трамп иттифоқчилардан ҳам, рақиблардан ҳам АҚШнинг Ғазони эгаллаб олишига кескин қарши чиқишларни кутиши мумкин, деб таъкидлайди Reuters. АҚШнинг у ердаги тўғридан тўғри иштироки Вашингтоннинг узоқ муддатли сиёсатига зид ва Ғазо босиб олинган Ғарбий Соҳилни ўз ичига олган бўлажак Фаластин давлатининг бир қисми бўлишига ишонадиган халқаро ҳамжамиятнинг катта қисмига хуш келмайди.
CNN`нинг ёзишича, Трамп АҚШ қандай қилиб Ғазони эгаллаши ёки босиб олиши мумкинлиги ҳақидаги саволга тўғридан-тўғри жавоб бермади, лекин у секторда хавфсизликни таъминлашга ёрдам бериш учун АҚШ қўшинларини юборишни истисно қилмади. «Ғазога келсак, биз керакли ишни қиламиз. Агар керак бўлса, биз буни бажарамиз. Бу қисмни эгаллаб, уни ривожлантирмоқчимиз», — деди у. Сайловолди кампанияси давомида сиёсатчи АҚШ қўшинларининг хориждаги ҳарбий ҳаракатларда иштирок этишига йўл қўймасликка ваъда берганди.
«Минг-минглаб иш ўринларини яратамиз ва бу бутун Яқин Шарқ жуда фахрланиши мумкин бўлган нарса бўлади. Мен узоқ муддатли эгалик позициясини ва бу Яқин Шарқнинг ўша қисмига катта барқарорлик олиб келишини кўряпман», — деб қўшимча қилди Трамп.
«АҚШ Ғазо секторини эгаллаб олади ва биз у ер билан ҳам иш олиб борамиз. Биз унга эгалик қиламиз ва портламай қолган барча хавфли бомбалар ҳамда объектдаги бошқа қуролларни демонтаж қилиш учун жавобгар бўламиз», — деди Трамп журналистларга.
https://twitter.com/potus/status/1886942370958119161?s=46&t=xj0WPeUhyrlIaqrf-S3Yig
У ерда кимлар яшаши ҳақида сўралганда, Трамп бу «дунё аҳолиси» учун маконга айланиши мумкинлигини айтди. АҚШ президентининг фикрича, 2 миллиондан ортиқ одам яшайдиган, урушдан вайрон бўлган сектор вақт ўтиши билан нафақат фаластинликлар, балки «бутун дунёдан келган одамлар» ҳам жойлашиши мумкин бўлган «Яқин Шарқ Ривьераси»га айланиши мумкин.
«Бу шунчаки ажойиб бўлади», — деди Трамп ва унинг режаси бутун минтақага «буюк тинчлик» олиб келиши мумкинлигини айтди. Унинг қўшимча қилишича, у Ғазо сектори, Исроил ва Саудия Арабистонига ташриф буюради.
Нетаньяҳу янги ёндашувни синаб кўраётгани учун Трампни «янгича фикрлайдиган» деб атади ва «анъанавий фикрлашни синдиришга тайёрлигини кўрсатаётганини» айтди, деб ёзади Reuters. «Менимча, бу тарихни ўзгартириши мумкин. Ва мен ҳақиқатан ҳам бу йўлдан бориш керак, деб ўйлайман», — деди Исроил бош вазири.
АҚШ давлат котиби Марко Рубио «Ғазони яна гўзал қилишга» чақирди ва Трампнинг машҳур MAGA (Make America Great Again) шиорига ишора қилиб, «Make Gaza Beautiful Again» жумласини қўллади. Шу билан бирга, унинг сўзларига кўра, сектор ҲАМАСдан озод бўлиши, гуруҳ у ердан кетиши керак.
