Украина президенти Владимир Зеленский кенг кўламли уруш бошланганидан бери 45 100 нафар ҳарбий ҳалок бўлганини, 390 минг нафари яраланганини айтди. Зеленский бу ҳақда британиялик журналист Пирс Морганга берган интервьюсида гапириб ўтди.
Зеленский 2 ой олдин 43 минг украиналик ҳарбий ҳалок бўлгани ва 370 минг киши яралангани ҳақида хабар берганди.
У Россиянинг йўқотишлари ҳақида сўзларкан, тахминан 350 минг ҳарбий ҳалок бўлганини таъкидлади. Яна 50−70 минг нафари бедарак йўқолган, 600−700 минг нафари жароҳатланган.
Украина ва Россия камдан-кам ҳолларда ўз йўқотишлари ҳақида маълумот беради, одатда фақат душманнинг йўқ қилинган тирик кучлари ва техникаси ҳақида хабарларни кўриш мумкин.
Ушбу маълумотларни мустақил манбалардан тезкор равишда тасдиқлаш деярли имконсиз, деб ёзади Meduza. Нашр 2024 йил июль ойида Украинага кенг кўламли босқин пайтида ҳалок бўлган россияликларнинг умумий сонини 120 минг киши деб баҳолаганди.
The Wall Street Journal 2024 йилнинг сентябрь ойида Россия ва Украинанинг урушдаги йўқотишлари 1 млн кишига етгани ҳақида ёзганди. Бунда Украина Қуролли кучларининг ҳалок бўлган ҳарбий хизматчилари сони 80 мингни, ярадорлар сони эса 400 минг кишини ташкил қилгани айтилади.
Ғарб разведкасининг Россия йўқотишлари ҳақидаги ҳисоб-китоблари турлича: баъзи манбаларга кўра, қурбонлар қарийб 200 мингга, ярадорлар сони эса 400 мингга яқин.
