Малайзиянинг Meraque компанияси Ўзбекистонда қишлоқ хўжалигининг ақлли технологиялари ва дронлар ишлаб чиқаришни йўлга қўйишни режалаштирмоқда, дея хабар қилмоқда Қишлоқ хўжалиги вазирлиги матбуот хизмати.
Ишлаб чиқаришни Тошкент вилоятининг Янгийўл туманидаги Қишлоқ хўжалигини механизациялаштириш илмий-тадқиқот институти ҳудудида ташкил этиш кўзланмоқда.
Бу борада вазирлик вакиллари, Тошкент ва Қашқадарё вилоятлари раҳбарлари, шунингдек, кластерлар вакилларидан иборат делегациянинг Куала-Лумпурга ташрифи чоғида келишувга эришилди.
Ўтган йилнинг сентябрь ойида Қишлоқ хўжалиги вазирлиги Meraque Ўзбекистонда 1000 та иш ўрни ва 100 минг гектар қишлоқ хўжалигига хизмат кўрсатадиган ишлаб чиқариш корхонасини ташкил этиш учун уч йил давомида 20 млн Малайзия ринггити (тахминан 4,5 млн доллар) сармоя киритишни режалаштираётгани ҳақида хабар берган эди.
Бундан ташқари, компания минтақадаги технологик такомиллаштириш учун яна 30 млн ринггит (6,78 млн доллар) жалб қилмоқчи.
Томонлар, шунингдек, 100 минг фермернинг самарадорлиги ва барқарорлигини ошириш учун қишлоқ хўжалигида дронлар экотизимини яратиш сиёсатини ишлаб чиқади. Шунингдек, Meraque дрон операцияларини қўллаб-қувватлаш учун ўқув дастурлари орқали ўқитиш ва билим алмашишга эътибор қаратади.
Маълумот ўрнида, Meraque компанияси 2018 йилда бино ва иншоотларни бошқариш ҳамда хизмат кўрсатиш бўйича корхона сифатида ташкил этилган. Вақт ўтиши билан у ўз фаолиятини кенгайтириб, қишлоқ хўжалиги, телекоммуникация, таълим, академик дастурлар ва логистика соҳаларида ҳам иш олиб борган. 2022 йилда компания Германиянинг бозор тадқиқотларига ихтисослашган Drone Industry Insights консалтинг агентлиги томонидан дрон технологиялари соҳасидаги хизмат кўрсатувчи компаниялар рейтингида 18-ўринни эгаллаган.
Meraque Индонезия, Филиппин, Покистон ва Камбоджада ҳам фаолият юритади.
Бошқа шартномалар
Шу билан бирга, Малайзия Қишлоқ хўжалиги тадқиқотларини ривожлантириш институти ва Ўзбекистон Қишлоқ хўжалиги вазирлиги ҳузуридаги Қишлоқ хўжалигида билим ва инновациялар маркази ўртасида имзоланган келишув асосида малайзиялик селекционер олимлар томонидан яратилган шўрга ва сувсизликка чидамли, қора, узун ҳамда ароматик шоли навларини Ўзбекистонда тажриба сифатида экиб кўпайтириш учун уруғлар олиб келинади.
Шу билан бирга, Ўзбекистонда етиштирилган «девзира» шоли уруғлари Малайзияга жўнатилади.
Малайзия Қишлоқ хўжалиги ва озиқ-овқат хавфсизлиги вазирлигининг Балиқчилик департаменти ҳамда «Ўзбекбалиқсаноат» уюшмаси ҳамкорлигида Ўзбекистонда Малайзиянинг янги технологиялари асосида интенсив балиқчилик, биофлок ва криветка етиштириш лойиҳалари, шунингдек, Малайзия Қишлоқ хўжалиги маркетинг агентлиги билан ҳамкорликни ривожлантириш орқали Ўзбекистонда етиштирилган мева-сабзавот ва ипак маҳсулотларини экспорт қилиш йўлга қўйилади.
Малайзиянинг Jakim ташкилоти билан ҳамкорликда ўзбекистонлик фермерлар ва тадбиркорлар учун «Ҳалол» сертификати олиш бўйича ўқув курсларини ташкил этиш бўйича келишувга эришилди.
Эслатиб ўтамиз, Куала-Лумпурда Шавкат Мирзиёев ва Малайзия бош вазири Анвар Иброҳим ўртасида бўлиб ўтган музокаралар якунлари бўйича божхона, олий таълим, соғлиқни сақлаш соҳаларида ҳамкорлик тўғрисида битимлар, «ақлли» шаҳарларни ривожлантириш соҳасида ҳамкорлик тўғрисида баённома ва 2025−2026 йилларга мўлжалланган коррупцияга қарши курашиш бўйича ҳамкорликни чуқурлаштириш режаси имзоланганди.
