Президент 5 февраль куни Куала-Лумпурга расмий ташрифи чоғида Тошкент вилоятида Малайзия компаниялари учун махсус иқтисодий зона ташкил этилганини маълум қилди.
«Биз Малайзия компаниялари учун барча имтиёзларга эга иқтисодий зона очдик. Бу нима дегани? Бутун дунё ҳамжамияти тадбиркорлари учун қандай имкониятлар очилган бўлса, сизларга ҳам алоҳида бўлади. Ўзим назорат қиламан. Ер тайёр, коммуникация тайёр», — деди у «Ўзбекистон 24» телеканалидаги репортажда.
Давлат раҳбари Ўзбекистон билан Малайзия ўртасидаги масофа узоқлигини, бироқ «ҳамкорлик учун кучли ирода ва хоҳиш юксаклигини» қайд этди.
Ўзбекистон президенти Малайзия бош вазири Анвар Иброҳим билан энергетика, сунъий интеллект, қишлоқ хўжалиги ва таълим соҳаларидаги лойиҳаларни, шунингдек, маълумотлар марказларини яратиш масалаларини муҳокама қилганини қўшимча қилди.
«Биз биргаликда кўп-кўп масалаларни келишиб олдик, ечими йўқ бирорта масала қолмади. Вақт шиддат билан тез ўтяпти. Бугунги келишувларни амалда бажариш учун нима керак бўлса, ўша шароитларни яратишга тайёрмиз. Бизда хоҳиш бор, сизларда технология бор. Ана шу хоҳиш ва технологияни бирлаштирсак, жуда улкан натижалар бўлишига ишонаман», — деди Шавкат Мирзиёев.
Давлат раҳбари 2016 йилда Ўзбекистонга 1 млрд доллар, 2024 йили эса 35 млрд доллар хорижий инвестиция киритилгани хорижий инвесторларнинг ишончидан далолат эканини таъкидлади.
Президент Малайзиядан келган тадбиркорлар ва ҳамкорларга шахсан ўзи кафолат бераётганини айтди.
«Ҳар битта лойиҳангиз бўйича Вазирлар Маҳкамасининг алоҳида қарори чиқади, масъул ва жавобгар бўлади. Биз биродарим [Анвар Иброҳим] билан, албатта, назоратга оламиз. Ўзбекистон сизлар учун очиқ эканлигига ишонишингиз керак. Ўзбекистон сизлар учун Ўрта Осиёга дарвоза. Биз очиқлик сиёсати билан кутиб олишга ҳарвақт тайёрмиз», — деди давлат раҳбари.
Шавкат Мирзиёев ва Анвар Иброҳимнинг Куала-Лумпур шаҳрида бўлиб ўтган музокаралари якунлари бўйича божхона, олий таълим, соғлиқни сақлаш соҳаларида ҳамкорлик тўғрисида битимлар, «ақлли» шаҳарларни ривожлантириш соҳасида ҳамкорлик тўғрисида баённома ва 2025−2026 йилларга мўлжалланган коррупцияга қарши курашиш бўйича ҳамкорликни чуқурлаштириш режаси имзоланди.
Президент Малайзиянинг Petronas компанияси Ўзбекистонда хомашёни чуқур қайта ишлаш ва «яшил» энергетика лойиҳаларини амалга ошириш борасидаги истиқболли режаларни қўллаб-қувватлади. Ҳамкорликнинг устувор йўналишлари геология-қидирув ишларини олиб бориш ва истиқболли углеводород конларини ўзлаштириш бўлади.
