Ўзбекистон Бош прокуратураси 13 ёшли қизга пул эвазига эркак билан жинсий алоқа қилишни таклиф қилган эр-хотиннинг иши бўйича чиқарилган суд қарорининг қонунийлигини ўрганиб чиқди, деб хабар берди Бош прокуратура матбуот хизмати.
Эслатиб ўтамиз, Андижон вилоятида эркак 13 ёшли қиз билан жинсий алоқа қилмоқчи бўлиб, бунинг учун аввал 50 минг сўм, кейин 100 минг сўм таклиф қилган. Ўсмир қизни унинг ёнига хотини олиб келган. Эр-хотин шаҳвоний шилқимлик қилиш бўйича маъмурий модда бўйича суд қилинган. Эр беш суткага қамалган, хотини эса 750 минг жаримага тортилганди.
Бош прокуратура Олий суднинг Жиноят ишлари бўйича судлов ҳайъатига биринчи ва апелляция инстанцияси судларининг қарорлари устидан протест киритди, дейилади хабарда.
Аввалроқ зўравонликка қарши лойиҳада Nemolchi.uz вояга етмаганлар билан жинсий алоқа қилишга уриниш, шу жумладан, пул эвазига жинсий алоқа қилиш фақат Жиноят кодекси билан тартибга солинишини маълум қилган эди. «14 ёшгача бўлган болалар билан ҳар қандай жинсий алоқа қилиш ўта оғир жиноят бўлиб, дарҳол Жиноят кодексининг 118-моддаси 4-қисми „Номусга тегиш“ билан кўриб чиқилади. Болани унга мажбурлашгани, зўравонлик қўлланилгани ёки қўлланилмагани муҳим эмас», — дейилади лойиҳада.
