2023 йилдан буён Ўзбекистоннинг Буюк Британиядаги элчиси лавозимида ишлаб келаётган Равшан Усманов мамлакатнинг Исландиядаги биринчи элчиси бўлди. «Дунё» ахборот агентлигининг хабар беришича, у Исландия президенти Халла Томасдоттирга ишонч ёрлиқларини топширди.
Ўзбекистон ва Исландия ўртасида дипломатик муносабатлар 1997 йил 25 сентябрда ўрнатилган. Мамлакат президенти икки томонлама муносабатлар тарихида илк бор Ўзбекистон элчисининг ушбу мамлакатга тайинланишини олқишлади.
Томонлар икки томонлама ҳамкорлик истиқболларини муҳокама қилди, савдо-иқтисодий, маданий ва туризм соҳаларидаги алоқаларни кенгайтиришга алоҳида эътибор қаратди. Халла Томасдоттир энергетика, юқори технологиялар ва рақамлаштириш, балиқчилик, туризм ҳамда атроф-муҳитни ҳимоя қилиш каби соҳалардаги ҳамкорлик икки томонлама манфаатли бўлишини таъкидлади.
Равшан Усманов (1978 йилда туғилган) 2023 йил охирида Лондондаги элчи этиб тайинланган эди. У Бирмингем университети (Буюк Британия), Ўзбекистон Ташқи ишлар вазирлиги қошидаги Жаҳон иқтисодиёти ва дипломатия университети ва Тошкент давлат юридик институти (ҳозирги университет) битирувчиси ҳисобланади. Усманов Франция, шу билан бирга ўриндошлик асосида Италия ва Португалияда ҳам элчи бўлган.
