Ўзбекистон ҳукумати ҳузуридаги Миграция агентлиги ватандошларни ташкилий тарзда ишга жойлаштириш бўйича бир қатор Россия компаниялари билан шартномалар имзолади, деб хабар қилди идора матбуот хизмати.
Агентлик директори Беҳзод Мусаев Москвага хизмат сафари давомида Россияда фаолият юритаётган 20 га яқин компания раҳбарлари билан учрашув ўтказди.
«Мулоқот томонлар учун самарали кечди. Якунда Ant Yapi, Ozon Community, ПЭК ва SPAR Middle Volga компаниялари билан 7000 нафар ҳамюртимизни мазкур компанияларга ташкилий тарзда ишга жойлаштириш бўйича ҳамкорлик шартномалари имзоланди», — дейилади агентлик хабарида.
Қайд этилишича, улардаги шароит, ойлик маошлар ўрганилган. Номзодларни саралаш тадбирлари Ўзбекистон ҳудудларида февраль ойида бўлиб ўтади.
Ant Yapi — Туркия қурилиш холдинги. Компаниянинг Россиядаги объектларидан бирида аллақачон 800 га яқин ўзбекистонлик меҳнат қилмоқда. Агентлик делегацияси иш ва яшаш шароитлари билан танишди.
2024 йил декабрь ҳолатига кўра, Россиядаги Ant Yapi объектларида жами 20 мингга яқин ўзбекистонлик ишлаган. Ўшанда Миграция агентлиги холдингга қурилиш соҳасида яна 2000 нафар мутахассисга эҳтиёж борлигини маълум қилганди.
Январь ойида Миграция агентлиги Россиянинг Ozon Community компанияси омборларида ишлаш учун бухороликларни 450 та иш ўрнига ишга қабул қилди. Таклиф этилаётган иш ҳақи 70−100 минг рублни (9,4−13,4 млн сўм) ташкил этди.
Россиянинг ПЭК логистика компанияси Ўзбекистон ва Россия ўртасида юк ташиш билан шуғулланади. 2022 йил сентябрь ойида компания Тошкентда ўз филиалини очди.
SPAR Middle Volga — SPAR халқаро брендининг савдо тармоқларини бошқарувчи Россия компанияси. Илгари бу компания ҳам ПЭК каби Ўзбекистондан ходимларни жалб қилган.
