АҚШ президенти Дональд Трамп Россия президенти Владимир Путин билан Украинадаги урушни тугатиш масаласини муҳокама қилиш учун телефон орқали гаплашганини айтди, деб хабар берди шанба куни кечқурун New York Post (NYP).
Жума куни Air Force One самолётида берган интервьюсида Трамп икки етакчи яқин орада неча марта гаплашгани ҳақидаги саволга «айтмаганим маъқул» дея жавоб қайтарди.
«У (Путин) одамлар ортиқ ўлмаслигини хоҳлайди», — дея билдирди Трамп New York Post газетасига.
Январь ойи охирида Кремль матбуот котиби Дмитрий Песков Путин Трамп билан телефон суҳбати ўтказишга тайёрлигини ва Москва Вашингтондан ҳам тайёрлиги ҳақидаги хабарни кутаётганини айтганди. Шунингдек, жума куни Трамп келаси ҳафта Украина президенти Владимир Зеленский билан учрашиб, уруш тугашини муҳокама қилишини билдирган.
24 февраль куни Россиянинг Украинага кенг кўламли бостириб кириши билан бошланган урушга уч йил тўлади. Можаро пайтида минглаб одамлар ҳалок бўлди, уларнинг аксарияти украиналиклар.
Трамп New York Post нашрига «Путин билан ҳар доим яхши муносабатда бўлгани» ва урушни тугатиш бўйича аниқ режаси борлигини айтди. Аммо у бошқа тафсилотларни ошкор қилмади. «Умид қиламанки, бу тез орада бўлади», — деди Трамп. «Ҳар куни одамлар вафот этмоқда. Украинада бу уруш жуда ёмон аҳволда. Мен бу лаънати нарсани тугатмоқчиман».
Трампнинг сўзларига кўра, АҚШ Украинадаги 500 млн долларлик нодир ер қазилмалари ва газга эгалик қилиш эвазига эҳтимолий тинчлик келишувида Украинага хавфсизлик кафолатларини беради.
Трамп, шунингдек, миллий хавфсизлик бўйича маслаҳатчи Майк Уолтцга мурожаат қилиб, шундай деди: «Келинг, бу учрашувларни ўтказайлик. Улар учрашмоқчи. Ҳар куни одамлар ҳалок бўлмоқда. Ёш, чиройли аскарлар ҳалок бўлмоқда. Ўғилларимга ўхшаган йигитлар», — дея ёзади New York Post.
АҚШ вице-президенти Жеймс Дэвид Вэнс 14−16 февраль кунлари бўлиб ўтадиган Мюнхен хавфсизлик конференциясида Зеленский билан учрашади, дейилади NYP материалида.
- Февраль ойида бошида Саудия Арабистони ва БАА Россия томонидан Дональд Трамп ва Владимир Путин ўртасидаги учрашув учун эҳтимолий жой сифатида кўрилаётгани ҳақида хабар берилганди. Икки давлат ҳам Путинни ҳибсга олиш учун ордер берган Халқаро жиноий суд аъзоси эмас.
- Январь ойи охирларида эса ОАВ Трамп агар Россия урушни тўхтатиш бўйича музокаралардан бош тортган тақдирда, санкциялар билан таҳдид қилгани ҳақида ёзганди. У Путин билан «жуда тез муддатда» гаплашишни режалаштираётганини қўшимча қилган.
- Январь охирида Владимир Зеленский Украинада тинчлик бўйича ҳар қандай музокаралар Украина иштирокисиз ўтиши мумкин эмаслиги, чунки улар ҳеч қандай натижага олиб келмаслигини таъкидлаган.
