Тошкент шаҳридаги Nazar Medical шифохонаси болаларга тегишли лицензиясиз стоматологик хизмат кўрсатиб келгани аниқланди. Бу ҳақда Рақобат қўмитаси хабар қилди.
Қайд этилишича, қўмитага фуқаро Ш. Г. мурожаат қилиб, фарзандлари ва аёлини Nazar Medical клиникасига тишларини даволатиш учун олиб борганини, бир неча кунлик муолажадан кейин сифатсиз хизмат кўрсатилгани сабабли пломбалари тушиб кетганини маълум қилди. У тўланган пулларни қайтариш ва клиникага нисбатан чора кўришни сўраган.
Мурожаат асосида Рақобат қўмитаси Nazar Medical клиникасини жалб қилган ҳолда текширув ўтказди. Корхона томонидан истеъмолчига тиббий хизмат кўрсатилгани ва улар амалдаги талабларга мувофиқ бажарилгани қайд этилди.
Шу билан бирга, истеъмолчилар ҳуқуқларини ҳимоя қилиш бўйича махсус ваколатли орган — Соғлиқни сақлаш вазирлигини жалб этган ҳолда ўрганишлар ўтказилди. Унда Nazar Medical клиникаси болалар терапевтик стоматологияси бўйича тиббий фаолият юритиш учун лицензияга эга эмаслиги маълум бўлди.
Эксперт хулосасига кўра, клиника беморга кўрсатилган стоматологик хизматни тегишли клиник протоколларга мувофиқ амалга оширмаган. Шунингдек, фуқаронинг фарзанди учун тегишли тиббий ҳужжатлар тақдим этилмаган.
Текширув натижасида тўпланган ҳужжатлар белгиланган тартибда кўриб чиқиш учун ваколатли органга юборилди. «Nazar Medical» МЧЖга нисбатан лицензия талабларини бузгани учун камчиликларни бартараф этиш ва амалга оширилган ишлар ҳақида маълумот тақдим этиш бўйича қарор чиқарилди.
