Самарқанд вилоятида 27 ёшли Шаҳноза исмли аёл турмуш ўртоғи томонидан калтакланганидан сўнг вафот этди. Бу ҳақда марҳуманинг яқин қариндоши Nemolchi.uz`га орқали маълум қилди.
2025 йил 6 январь куни Шаҳноза эрининг зўравонлигидан сўнг дарҳол ички ишлар идораларига мурожаат қилмасдан, маҳалладан ёрдам сўраб чиққан. Бироқ на маҳалла, на бошқа маҳаллий органлар бу ҳолат ҳақида ҳуқуқ-тартибот идораларига хабар беришган ёки унинг хавфсизлигини таъминлаш учун чоралар кўришган. 12 январь куни аёлнинг онаси Россиядан келиб, уни касалхонага олиб борган.
«Аббос хотинини болаларининг кўз ўнгида калтаклаган, улар ҳаммасини бувисига айтиб беришган. Калтаклагандан кейин у шифокорга кўринишга рухсат бермай сигирларга қарашга мажбурлаган», — дейилади хабарда.
Касалхонага ётқизилган вақтда аёлнинг танасида эски ва янги гематомалар мавжудлиги аниқланган. Лекин аёлнинг соғлиғи юзасидан тўлиқ текширув ўтказилмаган. Шифокорлар унга фақат умумий — стресс ва кўкаришлар ташхисини қўйиш билан кифояланган. Марҳуманинг эри ҳам касалхонага келиб, уни калтакламаганини айтишни талаб қилиб, жабрланувчини видеога олган.
1 февраль куни Шаҳнозанинг аҳволи оғирлашиб, реанимацияга ўтказилган ва ўша ерда вафот этган.
«Аёлнинг онаси қизининг ички жароҳатлари бор-йўқлиги, ўлимига нима сабаб бўлганини ҳалигача билмайди. Тергов ишлари ҳозирги ҳолати ҳақида оилага ҳеч қандай маълумот берилмаган. 16 январь куни марҳуманинг онаси ички ишлар органларига ариза билан мурожаат қилган. Бироқ жиноий иш қўзғатиш ўрнига, ундан калтакланиш ҳақида гапирмасликни сўрашган ва бу ҳолат чуқур ўрганилмаган. Аёлнинг ўлимидан кейин суд-тиббий экспертиза ўтказилганига қарамай, гумонланувчи ҳали ҳам озодликда қолмоқда», — дея таъкидлайди Nemolchi.uz.
Nemolchi.uz ҳаракати ушбу воқеани ўрганишни давом эттиришини ва вазиятга бефарқ бўлган барча масъулларнинг жавобгарликка тортилишини талаб қилмоқда.
