Бош прокуратурага кичик қувватли қайта тикланувчи энергия манбалари қурилмаларини (қуёш панеллари) ўрнатишни таъминлаш топширилди. Бу президентнинг 7 февралдаги 2025 йилга мўлжалланган давлат дастурини амалга ошириш тўғрисидаги қарорида назарда тутилган.
Бош прокурор ўринбосари Шохрух Аминов қуёш панеллари ва гелиоколлекторлар ўрнатилишида қонунчилик талабларига сўзсиз риоя этилиши устидан қатъий назоратни амалга ошириб боради.
«Атроф-муҳитни муҳофаза қилиш ва «яшил иқтисодиёт» йили»да, шунингдек, республика энергобалансида қайта тикланувчи энергия улушини ошириш, шу жумладан, давлат-хусусий шериклик асосида йирик «яшил энергия» станцияларини барпо этиш, ҳудудларда кичик ва микро гидроэлектр станциялари тармоғини кенгайтириш, аҳоли хонадонларида қуёш панелларини ўрнатишни рағбатлантириш белгиланган.
2025 йилда умумий қуввати 4,5 ГВт бўлган йирик қуёш ва шамол электр станциясини ишга тушириш, қуввати 785 мегаватт бўлган қуёш панелларини ўрнатиш, қуввати 225 мегаватт бўлган гидроэлектр станцияларини барпо этиш орқали жами қайта тиклануви энергия манбалари улушини электр энергияси ишлаб чиқаришда 26 фоизга ва жами генерация қувватлари таркибидаги улушини 40 фоизга етказиш режа қилинмоқда.
Энергетика вазирлиги Қорақалпоғистон Вазирлар Кенгаши, вилоятлар ва Тошкент шаҳри ҳокимликлари билан биргаликда бир ой муддатда мазкур йилда қуёш панеллари ва гелиоколлекторларни туман ва шаҳарлар кесимида ўрнатиш дастурини, бундан ташқари, 2025−2026 йилларда республика ҳудудларида микро гидроэлектр станцияларини қуриш дастурини Вазирлар Маҳкамасига киритиши керак.
Президент 27 январь куни бўлиб ўтган йиғилишда ресурс тежайдиган иқтисодиёт моделга ўтиш вақти келганини айтганди. Ўзбекистонда жами қувватлардаги «яшил» энергиянинг улушини 16 фоиздан 26 фоизга ошириш режалаштирилмоқда. Кам углеродли лойиҳаларни қўллаб-қувватлаш учун 300 млн доллар жалб қилинади.
Йиғилишда қуёш батареялари ва сув иситгичларини ўрнатишни рағбатлантириш учун 2 трлн сўм маблағ ажратиш масаласи муҳокама қилинган. Энергетика вазири Жўрабек Мирзамаҳмудовнинг таъкидлашича, 2 йил ичида аҳоли ва хўжалик субъектларини камида 50 фоиз томларини қуёш панеллари билан қоплаш режа қилинмоқда.
Бош прокурор ўринбосари Шохрух Аминов 2025 йилда аҳоли, кичик бизнес ва ижтимоий соҳа объектлари томонидан истеъмол қилинадиган электр энергиясининг камида 40 фоизи қайта тикланувчи энергия манбалари ҳисобига қопланиши кўзланганини билдирган. У бу вазифа «сўзсиз» бажарилишини таъкидлаган.
28 январь куни у ёқилғи-энергия ресурсларидан фойдаланиш устидан давлат назоратини самарали ташкил этиш ва мувофиқлаштириш бўйича Республика штабининг кенгайтирилган йиғилишини ўтказган. Учрашувда 100 мингта объектда ва 150 мингта хонадонда жами 600 МВт қувватда қуёш панели ўрнатиш режа қилингани маълум бўлган. Вазифа ижросини таъминлаш мақсадида жойларда маҳаллий ҳокимликлар, божхона органлари, «Ўзэнергоинспекция», тижорат банклари, таъминот корхоналари ва бошқа тегишли идоралардан иборат ишчи гуруҳ тузилади.
