Президент Дональд Трамп АҚШга пўлат ва алюминийнинг барча импортига аллақачон мавжуд бўлган металл божларига қўшимча равишда 25 фоизли божлар жорий этишини эълон қилди. Бу ҳақда у 9 февраль куни маълум қилди, деб ёзади Reuters.
Трамп, шунингдек, шу ҳафта охирида АҚШдан импортни солиққа тортадиган барча мамлакатлар учун ўзаро божлар эълон қилинишини айтди. «Агар улар биздан ҳақ олишса, биз улардан ҳақ оламиз», — деди у қайси мамлакатларга таъсир кўрсатишига аниқлик киритмасдан.
Reuters маълумотларига кўра, Қўшма Штатлардаги энг йирик пўлат етказиб берувчилар Канада, Бразилия, Мексика, Жанубий Корея ва Вьетнамдир.
Бирламчи алюминийнинг энг йирик етказиб берувчиси Канада ҳисобланади, унинг ҳиссасига 2024 йил январь-ноябрь ойларида умумий импортнинг 79 фоизи тўғри келди. Мексика алюминий чиқиндилари ва алюминий қотишмаларининг энг йирик етказиб берувчисидир.
Трампнинг баёноти аллақачон Жанубий Кореянинг асосий пўлат ва автомобиль ишлаб чиқарувчилари акциялари нархининг пасайишига олиб келди. Жанубий Корея АҚШнинг йирик пўлат экспортчиси ҳисобланади. 2024 йилнинг январь-ноябрь ойларида мамлакат Қўшма Штатларга қарийб 4,8 миллиард долларлик пўлат етказиб берди, бу унинг шу даврдаги жаҳон экспортининг 14 фоизини ташкил этди, дея аниқлик киритади AP.
10 февраль куни эрталаб олтин унцияси учун рекорд даражадаги 2896 долларга етди, бу инвесторларнинг Трамп сиёсатининг оқибатларидан хавотирлари ва хавфсиз активларга бўлган талаб фонида 1 фоиздан кўпроққа ошди. Умуман олганда, йил бошидан буён олтин 10 фоизга ошди, деб ёзади Guardian.
Биринчи президентлик даврида Трамп пўлат импортига 25 фоиз ва алюминий импортига 10 фоиз бож жорий қилганди, аммо кейинчалик Канада, Мексика ва Бразилия каби бир қанча савдо ҳамкорларига божсиз имтиёзлар берди. АҚШнинг собиқ президенти Жо Байден ушбу квоталарни Буюк Британия, Япония ва Европа Иттифоқига ҳам татбиқ этган.
Ўтган ҳафтада Трамп 4 февралдан бошлаб Канада ва Мексикадан товарлар импортига 25 фоизли, Хитойдан эса 10 фоизли божлар жорий этиш билан таҳдид қилганди. Улар кучга киришидан бир неча соат олдин Мексика ва Канада Қўшма Штатлар билан чегарани мустаҳкамлашга ваъда бериб, АҚШ билан божларни кечиктиришга келишиб олди. Хитой бунга жавобан АҚШдан суюлтирилган газ, кўмир, қишлоқ хўжалиги техникаси ва бошқа маҳсулотларга бож жорий қилди.
