Олий Мажлис Қонунчилик палатасининг навбатдаги мажлисида «Ўзбекистон Республикасида фуқароларнинг виждон эркинлигини таъминлаш ва диний соҳадаги давлат сиёсати концепциясини тасдиқлаш тўғрисида»ги қонун лойиҳаси иккинчи ўқишда кўриб чиқилди.
Қонун лойиҳаси ва у билан тасдиқланаётган концепция лойиҳаси 2025 йилнинг 31 январь куни қуйи палата мажлисида биринчи ўқишда қабул қилиниб, 10 февралга қадар палата расмий веб-сайтига жамоатчилик муҳокамаси учун жойлаштирилган эди.
Қайд этилишича, концепция лойиҳаси бўйича муҳокамаларда аҳолидан 400 тадан ортиқ изоҳлар, таклиф ва тавсиялар келиб тушган. 6 февраль куни эса Қонунчилик палатасида мамлакатдаги 16 та конфессия вакиллари билан концепция лойиҳасининг муҳокамасига бағишланган учрашув бўлиб ўтган.
Келиб тушган изоҳ, таклиф ва тавсиялар атрофлича ўрганиб чиқилди. Ушбу таклифларнинг муҳокамаси ҳамда концепция лойиҳасини маромига етказишга бағишлаб ишчи гуруҳи ва масъул қўмитанинг йиғилишлари ўтказилди.
Мажлисда концепция лойиҳаси кенг жамоатчиликнинг таклиф-мулоҳазалари асосида янада такомиллаштирилгани қайд этилди. Хусусан, фуқаролар ҳамда Қонунчилик палатаси депутатлари томонидан билдирилган таклифлар асосида концепциянинг 10 дан ортиқ бандларига тегишли ўзгартириш ва қўшимчалар киритилди.
Иккинчи ўқишга тайёрлаш жараёнида лойиҳага киритилган ўзгартириш ва қўшимчалар: турли конфессиялар ўртасида ўзаро мулоқотни ўрнатиш, конфессиялараро тотувлик ва ҳамжиҳатликни мустаҳкамлаш, Ўзбекистон халқининг динларга оид маданияти ҳамда ислом цивилизациясининг ёрқин ютуқлари сифатида тан олинган буюк мутафаккир ва олимларнинг диний-фалсафий меросини, қўлёзма манбаларни ўрганиш бўйича илмий-амалий тадқиқотларни қўллаб-қувватлаш, хотин-қизларнинг таълим олиши учун кенг шарт-шароитлар яратиш ҳамда уларни илм-фанга фаол жалб этиш орқали уларнинг ижтимоий-иқтисодий ва сиёсий фаоллигини ошириш каби масалаларга қаратилгани таъкидланди.
Шундан сўнг мазкур концепция ва уни тасдиқлаш ҳақидаги қонун қабул қилинди ва Сенатга юборилди.
