Тошкент вилоятида ўз хотинини ўлдиришда гумонланаётган эркак қўлга олинди, дея маълум қилди «Миллар» теледастури репортажида.
Аниқланишича, 1997 йилда туғилган аёл ўлимидан 10 кун олдин доимий жанжаллар туфайли аёл ота уйига қайтиб келган. 8 февраль куни тунда 1992 йилда туғилган эри аёлнинг ота-онасиникига келиб, уни машинасига ўтқазиб, олиб кетган.
Шундан сўнг аёлнинг жасади Олмалиқ шаҳри ҳудудидан топилган. Уни ўлдиришда гумонланган эркак қўлга олинган.
«Уни дарди фақат пул бўлган. Дориси учун пул керак бўлган. Қайнонаси ҳам доим гижгижлаб урдирарди. Қизим уларга пул топиб келиши керак эди. Уларнинг боқувчиси эди. Ҳимоя ордери берилганига қарамасдан уйга бостириб келди. Унга энг олий, оғир жазо берилишини хоҳлайман. У уйга келиб, қизимни қасддан ўлдирди, болаларни етим қолдирди», — деди марҳуманинг онаси.
«Қудам олдига, эр-хотин уришади, деб борсак, ўлдириб қўймаяпти-ку, деб жавоб берарди», — дейди аёлнинг онаси.
Бош прокуратуранинг хабар қилишича, ҳолат юзасидан Жиноят кодексининг 97-моддаси (Қасддан одам ўлдириш) билан жиноят иши қўзғатилган. Гумонланувчи процессуал тартибда ушланган, тергов бошланган.
