АҚШ президенти Дональд Трамп ва Россия президенти Владимир Путин деярли бир ярим соат давом этган телефон мулоқоти ўтказди. Бу ҳақда 12 февраль куни АҚШ президенти ва Кремль матбуот хизмати хабар берди.
Трамп суҳбатни «жуда самарали» деб атади. Унинг сўзларига кўра, томонлар Украина, Яқин Шарқдаги вазият, энергетика, сунъий интеллект, долларнинг мустаҳкамлигини муҳокама қилган, шунингдек, «халқларнинг буюк тарихи ва улар Иккинчи жаҳон урушида қандай муваффақиятли курашганликлари ҳақида фикр юритган».
«Биз мамлакатларимизнинг қудрати ва ҳамкорлик бир кун келиб бизга берадиган улкан фойда ҳақида гаплашдик. Лекин, биринчи навбатда, иккаламиз ҳам келишиб олганимиздек, биз Россия ва Украина ўртасидаги урушда оммавий қирғинни тўхтатмоқчимиз. Президент Путин ҳатто менинг сайловолди кампаниямдаги асосий шиоримни ишлатди: „Оқилона ёндашув“, биз иккаламиз ҳам бунга чин дилдан ишонамиз», — деб ёзди у.
АҚШ президенти Путин билан «биргаликда ишлашга, жумладан, мамлакатларимизга ўзаро ташриф буюришга» келишиб олганини таъкидлади.
«Шунингдек, биз ўз жамоаларимизга музокараларни зудлик билан бошлашга кўрсатма беришга келишиб олдик. Биринчи қадам Украина президенти Владимир Зеленскийга қўнғироқ қилиб, суҳбатимиз ҳақида маълум қилиш бўлади — мен буни ҳозир қиламан», — деди у.
Трамп давлат котиби Марко Рубио, Марказий разведка бошқармаси директори Жон Рэтклифф, миллий хавфсизлик бўйича маслаҳатчи Майкл Уолц ҳамда махсус элчи Стив Виткоффдан музокараларга раҳбарлик қилишни сўраганини айтди. У музокаралар муваффақиятли ўтишига ишонч билдирди.
«Миллионлаб одамлар урушда ҳалок бўлди, бу агар мен президент бўлганимда бз бермаган бўлардии, лекин бу содир бўлган экан, уни тўхтатиш керак. Бошқа ҳеч ким ўлмаслиги керак!» — деди Америка президенти.
Кремлнинг хабар беришича, давлат раҳбарлари Россия ва АҚШ фуқароларини алмашишга оид масалаларни муҳокама қилган.
«АҚШ президенти Америка томони эришилган барча келишувларни бажаришига ишонтирди», — дейилади баёнотда.
Россия президенти матбуот хизмати хабарига кўра, томонлар Украинадаги можарони ҳал қилиш масаласини ҳам муҳокама қилган.
«Дональд Трамп жанговар ҳаракатларни тезроқ тугатиш ва муаммони тинч йўл билан ҳал этиш тарафдори эканини айтди. Ўз навбатида, Владимир Путин можаронинг асл сабабларини бартараф этиш зарурлигини эслатиб ўтди ва Дональд Трамп билан тинч музокаралар орқали узоқ муддатли келишувга эришиш мумкинлиги ҳақидаги фикрга қўшилди», — дейилади хабарда.
Россия президенти, шунингдек, Америка давлати раҳбарининг мамлакатлар ҳамкорлик қилиш вақти келгани ҳақидаги асосий тезисларидан бирини қўллаб-қувватлаган.
Суҳбат чоғида Яқин Шарқдаги вазиятни тартибга солиш, Эрон ядро дастури, шунингдек, иқтисодий соҳадаги икки томонлама Россия-Америка муносабатлари мавзулари кўриб чиқилди.
Россия президенти Трампни Москвага ташриф буюришни таклиф қилди ва Америка расмийларини РФда «ўзаро манфаатли йўналишларда, жумладан, Украина келишуви мавзусида» қабул қилишга тайёрлигини билдирди.
Владимир Путин ва Дональд Трамп шахсий алоқаларни давом эттиришга, жумладан, шахсий учрашувлар ташкил этишга келишиб олди.
Шундан сўнг АҚШ президенти Украина президенти Владимир Зеленскийга қўнғироқ қилди, дея хабар бермоқда РБК Украина.
Эслатиб ўтамиз, 8 февралдаёқ Америка президенти Путин билан гаплашганини даъво қилган эди. Путин матбуот котиби Дмитрий Песков ўшанда Кремль суҳбат фактини «тасдиқлай ҳам, инкор ҳам қила олмайди» деб айтганди.
Февраль бошида Трамп АҚШ Украинага Россияга қарши мудофаа урушида, агар у мамлакат табиий ресурсларига, биринчи навбатда, ноёб тупроқ металларига эга бўлса, қўшимча ёрдам беришга тайёрлигини айтганди. Яқинда у АҚШ молия вазири Скотт Бессентни Украина президенти Владимир Зеленский билан учрашишга юборди. Reuters хабарига кўра, Молия вазирлиги раҳбари Украина ҳукумати билан АҚШнинг нодир металлар конлари, энергетика ресурслари ва энергетика соҳасидаги активларига киришини муҳокама қилиши керак. Муҳокама Украинадаги айрим давлат корхоналарига ҳам тегишли бўлади, дея қўшимча қилди исми сир қолишини истаган манба.
