Украина ва Россиядаги урушда бедарак йўқолганлар сони бир йил ичида икки баравар кўпайиб, 50 минг кишига етди. Бу ҳақда Reuters Халқаро Қизил Хоч қўмитаси (ХҚХҚ)га таяниб хабар берди.
«Ўтган йили ХҚХҚ томонидан қайд этилган бедарак йўқолганлар сони 23 минг кишини ташкил этганди. Бир йил ўтгач, бу рақам икки баравардан кўпроққа ошди. ХҚХҚ бедарак йўқолганларнинг 50 мингга яқин ҳолатини ҳужжатлаштирди», — деди ташкилотнинг можароларни кузатиш бўйича марказий агентлиги бюроси раҳбари Дусан Вуясанин Женевадаги журналистларга.
Бедарак йўқолганларнинг қарийб 90 фоизи ҳарбий хизматчилар ва аёллардир, дея қўшимча қилди у.
Уруш бошланган 2022 йил март ойидан бери ХҚХҚ ўзининг Марказий кузатув агентлиги бюроси орқали бедарак йўқолган одамларни қидиришни мувофиқлаштириб келмоқда, бунда Россия ва Украина халқаро ташкилот билан маълумот алмашади.
Ташкилот хабар қилинган бедарак йўқолганлар сонининг «экспоненциал ўсиши»ни — ойига ўртача 1000 дан 5000 гача — зиддиятнинг кучайиши ва оилалар учун онлайн ҳужжатлаштириш каби ҳисобот бериш механизмларининг яхшиланиши билан изоҳлади.
ХҚХҚ биринчи марта 2022 йилдан бери Украина ва Россиядан ҳар икки томон бедарак йўқолган одамларни ҳибсда ушлаб тургани ҳақида 16 мингта хабарнома олганини маълум қилди.
- Яқинда Зеленский уруш бошланганидан буён украиналик 45 100 нафар ҳарбий ҳалок бўлгани, 390 минг нафари яралангани ҳақида хабар берганди. Президент Россиянинг йўқотишларига ҳам тўхталиб, тахминан 350 минг ҳарбий ҳалок бўлганини айтган, яна 50−70 минг нафари бедарак йўқолгани, 600−700 минг нафари жароҳатланганини қўшимча қилган.
