АҚШ президенти Дональд Трамп Россия президенти Владимир Путин билан телефон орқали мулоқотдан сўнг Оқ уйда журналистлар олдида чиқиш қилди ва Россия-Украина уруши якуни ҳақидаги саволларга жавоб берди. «Газета.uz» Америка етакчисининг асосий тезисларини келтиради.
Трампнинг айтишича, у Путин билан «жуда яхши суҳбат» ўтказган ва Россия президенти «бунинг (Украинадаги уруш — таҳр.) тугашини истайди». Унинг сўзларига кўра, иккаласи ҳам бир-бири билан учрашувни кутмоқда.
«Биз у бу ерга [АҚШга] келишини кутмоқдамиз, мен эса у ерга [Россияга] бораман ва биз Саудия Арабистонида ҳам учрашамиз… нима қила олишимизни кўрамиз. Лекин урушни тугатмоқчимиз. Бу катастрофа», — деди Трамп.
АҚШ президентининг сўзларига кўра, бу борада якуний қарор ҳали қабул қилинмаган, ушбу учрашув санаси эса «ҳали белгиланмаган», бироқ у «яқин келажакда» бўлиб ўтиши мумкин.
Учрашувда Украина президенти Владимир Зеленский иштирок этадими, деган саволга Трамп шундай жавоб берди: «Эҳтимол, биз биринчи учрашувни ўтказамиз, кейин эса иккинчиси билан нима қилиш мумкинлигини кўрамиз». Шунингдек, у Киевга ташриф буюриш ҳақида «ўйлаб кўришини» айтди.
Трамп Украина бўйича тинчлик режаси тафсилотларини ошкор қилишдан бош тортди, бироқ унинг маъмурияти «катта ютуқларга эришганини» таъкидлади.
Трамп Украинанинг НАТОга аъзолигини «реал» деб ҳисобламаслигини айтди ва АҚШ мудофаа вазири Пит Ҳегсетнинг чоршанба куни Брюсселда бўлиб ўтган Украина бўйича алоқа гуруҳи йиғилишида қилган баёнотига қўшилди. «У буни эҳтимолдан йироқ ва амалий эмас деб ҳисоблайди. Менимча, у ҳақ. Президент Путиндан анча олдин улар [Россия ҳукумати] бунга йўл қўймасликларини айтишганди… Улар Украина НАТОга кира олмаслигини айтишган», — деди АҚШ президенти.
«Украинани тинчлик жараёнининг тўлақонли аъзоси сифатида кўрасизми?» деган саволга Трамп «Украина ҳукумати «тинчлик ўрнатиши керак»лигини айтди. «Уларнинг одамлари ўлдирилмоқда. Менимча, улар сулҳ тузишлари керак бўлади», — деди у.
АҚШ Украинага ёрдам беришда давом этмоқда, акс ҳолда, «Путин ғалаба қозондим деб ўйлаган бўларди», деди Трамп, бироқ Киевдан бу маблағларни қайтариш кафолатини талаб қилганини таъкидлади. «Украина бунга рози», — дея қўшимча қилди у.
Трамп Украинанинг 2014 йилдаги чегараларига қайтишини «эҳтимоли кам» деб атади, бироқ Россия томонидан босиб олинган ҳудудларнинг бир қисми Киев назорати остига қайтишини истисно қилмади.
- 12 февраль куни Трамп Владимир Путин билан телефон орқали мулоқот қилди. Америка президентининг сўзларига кўра, улар Украинадаги урушни тугатиш бўйича «зудлик билан музокараларни бошлаш»га келишиб олган. Кейинроқ Трамп Украина президенти Владимир Зеленский билан телефон орқали мулоқот қилди. Зеленскийнинг сўзларига кўра, суҳбат чоғида Киев ва Вашингтоннинг «Россия агрессиясини тўхтатиш» бўйича қўшма қадамлари муҳокама қилинган. Ўз навбатида, Трамп Украина президенти «Путин каби сулҳ тузишни хоҳлаётганини» таъкидлади.
