7−14 февраль кунлари Хитойнинг Ҳарбин шаҳрида ўтказилаётган қишки Осиё ўйинларида Ўзбекистон 26 йил ичида илк бор олтин медални қўлга киритди. Тарихий ютуққа 2024 йилдан буён миллий терма жамоа шарафини ҳимоя қилиб келаётган фигурали учувчилар Дмитрий Чигирев ва Екатерина Гейниш сазовор бўлди.
Жуфтлик фигурали учиш бўйича Чигирев ва Гейниш қисқа дастурда энг яхши натижани кўрсатди — 64,55 балл. Кейинги ўринларни Япония (58,49) ва КХДР (56,68) жуфтликлари эгаллади.
Эркин дастурда шимолий кореялик Тае Ок Рем ва Кум Чол Хан дуэти биринчи (112,2), Ўзбекистон иккинчи (111,88), Юна Нагаока ва Сумитада Моригучидан иборат Япония учинчи (109,86) ўринда бўлди.
Икки кўрсаткич йиғиндисига кўра, Чигирев ва Гейниш олтин медални (176,43), КХДР кумуш (168,88) ва Япония бронза медалини (168,35) қўлга киритди.
Бу қишки Осиё ўйинларининг фигурали учиш бўйича олтин медали тарихда иккинчи бор Ўзбекистонга насиб этди. 1999 йилда Жанубий Кореянинг Гангвондо шаҳрида Ўзбекистонда хизмат кўрсатган спортчи Татьяна Малинина биринчи ўринни эгаллади.
Умуман олганда, қишки Осиё ўйинлари тарихида Ўзбекистон терма жамоаси 8 та медаль — 2 та олтин, 2 та кумуш ва 4 та бронза медалини қўлга киритган.
Харбиндаги қишки Осиё ўйинларида 34 мамлакат ва минтақадан 1200 дан ортиқ спортчи иштирок этмоқда. Ягона олтин медаль эвазига Ўзбекистон умумжамоа ҳисобида бешинчи ўринга кўтарилди.
Видео
Фото
