АҚШ президенти Дональд Трамп Хорижда коррупцияга қарши курашиш тўғрисидаги қонун (FCPA) ижросини 180 кунга тўхтатиб туриш тўғрисидаги фармонни имзолади, деб хабар бермоқда Reuters. Бу қонун 1977 йилда қабул қилинган бўлиб, унга кўра, Америка фуқаролари ва ташкилотлари ўз бизнеслари манфаатларини кўзлаб чет эллик давлат амалдорларига пора беришлари тақиқланади.
«Қабул қилинганидан буён… FCPA тизимли ва доимий равишда ўзининг тегишли чегараларидан ташқарига чиқиб, Қўшма Штатлар манфаатларига зарар етказадиган тарзда суиистеъмол қилинмоқда. FCPA`нинг жорий қўлланиши Қўшма Штатларнинг ташқи сиёсат мақсадларига эришишга тўсқинлик қилади», — дейилади АҚШ президенти фармонида.
Ҳужжатда айтилишича, FCPA`нинг америкаликларга қарши «бошқа мамлакатларда бизнес юритишнинг одатий амалиёти» учун «ҳаддан ташқари кенг» қўлланиши прокуратуранинг чекланган ресурсларини беҳуда сарфлайди ва АҚШнинг иқтисодий рақобатбардошлигига «фаол зарар етказади».
АҚШ бош прокурорига олти ой ичида қонуннинг қўлланишини қайта кўриб чиқиш ва президентнинг ташқи сиёсатига мос келадиган янги тушунтиришлар бериш топширилди.
«Қоғозда бу яхши эшитилади, аммо амалда фалокат, — деди Трамп қонун ҳақида. — Бу шуни англатадики, агар америкалик бошқа мамлакатга бориб, у ерда легал, қонуний ёки бошқа тарзда бизнес юрита бошласа, бу деярли тергов ва айбловни кафолатлайди ва ҳеч ким бу туфайли америкаликлар билан бизнес юритишни хоҳламайди».
«Бу Америка учун анча кўпроқ бизнесни англатади», — дея ўз қарорини изоҳлади АҚШ президенти.
Турли йилларда FCPA доирасидаги терговларнинг субъектлари Американинг йирик компаниялари, жумладан, Goldman Sachs ва Walmart бўлган. Оқ уй маълумотларига кўра, Адлия вазирлиги ҳамда Қимматли қоғозлар ва биржалар комиссияси 2024 йилда FCPA билан боғлиқ мажбурий чораларни қўллаш бўйича 26 та даъво аризаси киритган. Камида 31 та компания тергов остида қолган.
New York Times нашри билан суҳбатлашган экспертларнинг фикрича, ушбу қонуннинг амал қилишини тўхтатиб туриш коррупцион фаолиятнинг ўсишига олиб келиши мумкин.
