ҲАМАС Исроил билан Ғазода ўт очишни тўхтатиш бўйича келишувни амалга оширишга содиқлигини ва гаровга олинганларни режалаштирилган вақтда озод қилишда давом этишини билдирди. Бу ҳақда BBC хабар берди.
Гуруҳ, ўз навбатида, уруш қайта бошланишининг олдини олиш мумкинлигига умид билдирди.
«Шунга кўра, ҲАМАС келишувни имзоланганидек амалга ошириш, жумладан, белгиланган муддатларда маҳбусларни алмашиш мажбуриятини яна бир бор тасдиқлайди», — дейилади баёнотда.
Ғазо сектори раҳбари Ҳалил Ал-Ҳайя Миср хавфсизлик амалдорлари билан музокаралар ўтказиш учун Қоҳирага ташриф буюрганди. Музокаралардан сўнг гуруҳ Миср ва Қатар воситачилари «тўсиқларни бартараф этиш ва келишмовчиликларни ҳал қилиш» бўйича саъй-ҳаракатларини давом эттиришини маълум қилди.
Исроил ҳукумати вакили хабарларга изоҳ бермади, бироқ агар ҲАМАС шанба куни гаровга олинган уч нафар тирик асирни озод қилмаса, ўт очишни тўхтатиш режими тугашини билдирди. Исроил ҳам ҲАМАСни келишувни бузганликда айблади, жумладан, пайшанба куни кечқурун ҳарбийлар ҲАМАС Ғазодан ракета учирганини ва у анклавга тушганини айтди, деб ёзади Reuters.
Аввалроқ Исроил бош вазири Биньямин Нетаньяҳу агар ҲАМАС 15 февралгача гаровга олинган исроилликларни қайтармаса, Ғазода жанговар ҳаракатларни қайта бошлашни ваъда қилганди.
Шунингдек, АҚШ президенти Дональд Трамп Исроилни ҲАМАС билан ўт очишни тўхтатиш бўйича келишувни бекор қилишга чақирган ва гуруҳдан шанба куни тушгача барча гаровга олинганларни қайтаришни талаб қилган, акс ҳолда, унинг сўзларига кўра, «жаҳаннам бўлади».
- ҲАМАС 10 февраль куни гаровга олинган исроилликларнинг навбатдаги гуруҳини озод қилиш бекор қилинганини эълон қилди. Айирбошлаш 15 февралда амалга оширилиши керак эди. Гуруҳ бундай қарорга келишига Исроил томонидан тинчлик келишувларининг бузилиши сабаб бўлганини айтди. ҲАМАС Исроилни Ғазо сектори шимолий қисми аҳолисининг қайтишига тўсқинлик қилишда, шунингдек, минтақага инсонпарварлик ёрдамини ўтказмасликда айблади. Исроил мудофаа вазири Исраэль Кац ҲАМАСнинг баёнотини «ўт очишни тўхтатиш режимининг тўғридан-тўғри бузилиши» деб атади.
- Январь ойи ўрталаридан бери ҲАМАС ва Исроил ўртасида тинчлик келишуви амал қилмоқда. Унинг шартларига кўра, дастлабки 42 кун ичида ҲАМАС 33 нафар исроиллик гаровга олинганларни озод қилишга, Исроил эса 1900 дан ортиқ фаластинлик маҳбусларни қамоқхоналардан озод қилишга ва Ғазо секторидан қўшинларни олиб чиқишни бошлашга ваъда берган. 9 февраль куни Исроил ўз мажбуриятлари доирасида Ғазо сектори марказини ажратиб турувчи Нецарим йўлагидан қўшинларини олиб чиққан.
