АҚШда бир гуруҳ штат бош прокурорлари Ҳукумат самарадорлиги департаменти (DOGE) раҳбари Илон Маскнинг федерал харажатларни қисқартириш бўйича саъй-ҳаракатларини тўхтатиш учун судга мурожаат қилди, деб хабар бермоқда Reuters.
Вашингтондаги федерал судда Нью-Мексико ва бошқа 13 та штат бош прокурорлари томонидан берилган даъвога кўра, Трамп Маскка АҚШ Конгрессининг рухсатисиз «назорат қилинмаган қонуний ваколатлар» берган.
Республикачи Трамп ўтган ойда президент бўлганидан сўнг Tesla бош директори ва дунёдаги энг бой одам бўлмиш Маскни беҳуда харажатларни йўқ қилиш учун масъул қилди.
Маск ва унинг департаменти ҳукумат компьютер тизимларига кириш ҳуқуқи борасида бир нечта шахсий маълумотлар дахлсизлиги бўйича даъволарга дучор бўлди. Янги даъво аризасида Маскнинг лавозимга ноқонуний тайинлангани таъкидланиб, унга ҳукумат номидан ҳар қандай ҳаракатларни амалга оширишни тақиқловчи қарор чиқарилиши талаб қилинмоқда.
«Президент Трамп бу мамлакат учун хавф туғдиришини ҳисобга олмаган ҳолда, Конгресснинг тегишли қонуний рухсатисиз ва унинг фаолияти устидан сезиларли назоратсиз жаноб Маскка деярли чекланмаган ваколатларни топширди», — деди штатлар Маскни ҳукуматдаги «хаос агенти» деб атаб.
DOGE`га қарши давом этаётган махфийлик бўйича ишларни назорат қилувчи икки федерал судья жума куни департаментнинг Ғазначилик департаменти тўлов тизимларига ва АҚШ соғлиқни сақлаш, истеъмолчилар ҳуқуқларини ҳимоя қилиш ҳамда меҳнат агентликларининг потенциал махфий маълумотларига кириш-кирмаслигини кўриб чиқади.
Шанба куни Манҳеттенда АҚШ округ судьяси Пол Энгелмайер Демократик штатлар бош прокурорларининг DOGE`га вақтинчалик блокни узайтириш тўғрисидаги илтимосини кўриб чиқади, бу эса Маск жамоасининг триллионлаб долларлик тўловлар учун масъул бўлган Ғазначилик тизимларига киришига тўсиқ бўлди.
Штатларнинг таъкидлашича, Маск жамоаси миллионлаб америкаликларнинг шахсий маълумотларини ўз ичига олган тўлов тизимларига киришда қонуний ҳуқуққа эга эмас.
Даъво аризасида, шунингдек, Маск ва унинг жамоаси соғлиқни сақлаш клиникалари, мактабгача таълим муассасалари, иқлим ташаббуслари ва бошқа дастурлар учун федерал молиялаштиришни бузиши мумкинлиги, Трамп эса бу маълумотлардан ўзининг сиёсий дастурларини илгари суриш учун фойдаланиши эҳтимоли борлиги айтилган.
Вашингтонда АҚШ округ судьяси Жон Бейтс DOGE жамоасининг Соғлиқни сақлаш ва ижтимоий хизматлар, Меҳнат департаменти ва Истеъмолчиларнинг молиявий ҳимояси бюросидаги махфий ёзувларга киришига йўл қўймаслик бўйича касаба уюшмалари сўровини кўриб чиқади.
Трампнинг қонуний эътирозга учраган ташаббусларининг аксарияти судлар томонидан блокланган, бу эса, гарчи президент суд буйруқларига бўйсунишини айтган бўлса-да, Маск ва Трампнинг бошқа иттифоқдошларини судьяларни импичмент қилишга чақиришга ундади.
- Баъзи ташаббуслар судда тўсиб қўйилганига қарамай, Трамп маъмурияти давлат хизматчиларини оммавий ишдан бўшатиш билан олдинга силжиди ва Американинг ташқи ёрдам дастурини кескин қисқартирди. Харажатларни камайтириш сиёсий консерваторлар қарши бўлган дастурларга қаратилган кўринади, дея таъкидлайди Reuters.
- Трамп маъмурияти USAID`ни мустақилликдан маҳрум қилиб, уни Давлат департаменти назоратига ўтказишни, шунингдек, агентлик ходимларини оммавий равишда ишдан бўшатишни режалаштираётгани ҳақида хабар берилганди.
- Шундан сўнг USAID билан шартнома асосида ишлайдиган ташкилот ва компаниялар Дональд Трамп маъмуриятини агентликни тугатиш бўйича ноқонуний ҳаракатларда айблаб судга берган. Бу, даъвогарларнинг таъкидлашича, хорижий ёрдам дастурларини молиялаштиришда тартибсизликларни келтириб чиқарди.
