Барча тизимдаги раҳбарлар ёшларнинг овозини эшитишга мажбур, дея маълум қилди Шавкат Мирзиёев Кўксарой қароргоҳидаги ёшлари билан мулоқотда.
«Ёшлар буюк келажагимизнинг асосий бўғини эканлигини тушунмаган раҳбар бизнинг сафимизда бўлишга ҳаққи йўқ», — деди президент.
Давлат раҳбари ёшларнинг тимсолида Янги Ўзбекистоннинг бугунги ва эртанги бунёдкорларини кўраётганини таъкидлади.
«Буюк шоиримиз Эркин Воҳидов айтганидек, ёшлик — бу қалбнинг олтин сози. Бунга қўшимча қилиб, ёшлар — халқимизнинг, Ватанимизнинг олтин фонди, десак тўғри бўлади», — дея таъкидлади президент ва аҳолининг 60 фоизини айнан ёшлар ташкил этишини қўшимча қилди.
«Бугунги кунда биз мард ва матонатли халқимизга, серғайрат ёшларимизга ишонганимиз учун ўз олдимизга катта-катта мақсадлар қўймоқдамиз, маррани баланд олмоқдамиз», — деди президент.
«Келгусида Учинчи Ренессанс пойдеворини яратадиган янги Хоразмийлар, Берунийлар, Ибн Синолар, Мирзо Улуғбек ва Алишер Навоийлар қаердан пайдо бўлади? Бу улкан вазифаларни ким бажаради? Мен қайта-қайта такрорлашдан чарчамайман. Албатта, бу эзгу ғояларни сизлар — бугунги Янги Ўзбекистон ёшлари амалга оширасизлар», — деди Шавкат Мирзиёев.
Ёшларимиз турли соҳалардаги ютуқлари билан тенгдошларига ўрнак бўлаётгани таъкидланди.
Ҳозирги вақтда дунёдаги «топ» олийгоҳларда 1,5 мингдан зиёд ўзбекистонлик талабалар таҳсил олмоқда. Бу Ўзбекистон учун тарихда кузатилмаган воқелик экани қайд этилди.
Президент Бирлашган Араб Амирликларида ўтган катта форумда Тошкент шаҳридаги Президент мактаби глобал даражада энг нуфузли Zayed Sustainability Prize номинациясида ғолиб деб топилганини айтди.
«Бунинг бош омили нимада, деб сўрасангиз, мен аввало ёшларга муносабат давлат миқёсида бутунлай ўзгарганида, деб жавоб берган бўлардим. Ўғил-қизларимиз ёшлар масаласи давлат сиёсатининг устувор йўналишига айланганини сезиб, ўзларига беқиёс куч олмоқда», — деди президент.
Бундан беш йил олдин Сенат ва Қонунчилик палатасида Ёшлар парламенти ташкил этилган эди. Президент у ерда ёшлар сиёсий етакчилик, демократия мактаби, парламентаризм мактаби қандай бўлишини амалда кўргани, охирги сайловда ана шу ёшлардан икки нафари Қонунчилик палатасига, 250 нафари кенгашларга депутат бўлиб сайланганини таъкидлади.
