Зулфия мукофоти совриндори, хонанда Ширин Абдуллаева вафот этди. Бу ҳақда Оила ва хотин-қизлар қўмитаси ҳамда «Ўзбекконцерт» маълум қилди.
Абдуллаева 2005 йил 14 декабрда Наманган вилояти Наманган шаҳрида туғилган. 2023 йилда у санъат йўналиши бўйича Зулфия номидаги Давлат мукофоти билан тақдирланган. Унинг «Лўли», «Метро», «Безори» ва бошқа қўшиқлари YouTube`да миллионлаб марта кўрилган.
Ширин Абдуллаева, шунингдек, 2021 йилда Россиянинг НТВ каналидаги машҳур телекўрсатув — «Ты — Супер!» иштирокчисига айланган ва ярим финалгача борган.
Фото: Президент матбуот хизмати
Ширин Абдуллаева Пекиндаги Цинхуа университетида Ижтимоий фанлар йўналишида ўқиётганди. 2024 йилда ўқишини Ўзбекистонга кўчирган. Университет Абдуллаевани «Ўзбекистоннинг Хитойдаги маданият элчиси» дея таърифлаган.
Ширин Абдуллаеванинг вафоти ҳақида ёзилган постларда унинг вафоти сабаби сўраларкан, муаллифлар «Касал эди» дея жавоб қайтаришди.
«Шаолинь жанг санъатини ўрганган. Рус, хитой, инглиз тилларини мукаммал эгаллаган. Бир қатор киноларда роль ижро қилган. Клиплари интернетда анча танилган. Хитой университетида 100 фоизли грант билан ўқиётганди… Беғубор қиз эди. Ҳамкорликда қўшиқлар яратгандик», — дея таъзия билдирди хонанда ижро этган бир нечта қўшиқларнинг сўзлари муаллифи, шоир Бобур Бобомурод (жумладан, «Ташаккур» қўшиғи).
«4 та қизингдан ҳам зўр бўлади ҳали шу кенжанг»
Ширин Абдуллаева тадбиркор, таркибида 20 дан ортиқ корхонани бирлаштирган BA Holding таъсисчиси Баҳодир Абдуллаевнинг энг кенжа — 5-қизи бўлиб, отаси қизи ҳақида YouTube`даги Jahongir Latipov блогига берган интервьюсида гапириб ўтганди.
«[4 та қиздан кейин] 5-фарзандни УЗИ (ультратовуш текшируви — таҳр.)да ўғил бола дейишган. Шунинг учун ўғил бола кутганмиз. Кўпроқ онаси ўғил хоҳлаган. Туғуруқхона ташқарисида кутиб турибмиз, ҳамшира қиз чиқиб, «Баҳодир ака, қиз муборак бўлсин!» деганда кулиб юбордим, хурсанд бўлиб кетдим. Нега эканини ўзим ҳам билмайман…
Ичкарига кириб, «Онаси, муборак бўлсин қиз фарзанд», десам, йиғлаб, тескари қараб олган. Мени хафа бўлди деб ўйлаган экан. Мен эса унга бундай қилмасликни, мингдан минг рози эканимни айтганман. Ҳали кўрасан, 4 та қизингдан ҳам зўр бўлади шу кенжа қизинг, деганман. Мана, опаларидан кам бўлмади", — деб эслайди Абдуллаев қизининг туғилишини.
