17 февраль куни Миллий олимпия қўмитасида учта спорт федерациясининг навбатдан ташқари сайлов анжуманлари ўтказилди. Тадбирларда Спорт вазирлиги вакиллари ва МОҚ раисининг биринчи ўринбосари Отабек Умаров иштирок этди, деб хабар берди Спорт вазирлиги ахборот хизмати.
Акмалхўжа Мавлонов
Божхона қўмитаси раиси Акмалхўжа Мавлонов Енгил атлетика федерацияси раиси этиб сайланди.
Федерация раисининг ўринбосарлари этиб Отабек Чориев, Андрей Абдувалиев ва Камолиддин Усмонов, бош котиб лавозимига эса Камолиддин Рўзмуҳаммедов тайинланди.
Алишер Мирсоатов (ўнгдан иккинчи)
Қишки спорт турлари ассоциациясига шу пайтгача Теннис федерациясини бошқариб келган Ўзбекистон Ўзмиллийбанк бошқаруви раиси Алишер Мирсоатов раҳбар этиб сайланди.
Теннис федерациясининг янги раиси этиб 2001 йилда «Капиталбанк»ни ташкил этган тадбиркор ва «Пахтакор» футбол клубининг собиқ президенти Ботир Икромжонович Раҳимов сайланди. У шунингдек, молия, суғурта, халқ истеъмоли моллари ишлаб чиқариш, қурилиш ва озиқ-овқат саноати соҳаларида фаолият юритувчи кўплаб компанияларнинг ҳам асосчисидир.
Ботир Раҳимов Россиялик миллиардер Алишер Усмоновнинг жияни бўлган марҳум Бобур Усмоновнинг беваси ҳамда биринчи хоним Зироат Мирзиёеванинг жияни Диёра Усмонованинг турмуш ўртоғидир.
Тадбирда иштирок этган расмийлар федерацияларнинг янги раҳбариятини масъулиятли лавозимга сайланишгани билан қутлашди. Уларга олдинда турган Милан-Кортина-2026 қишки ва Лос-Анжелес-2028 ёзги Олимпия ўйинларига тайёргарлик юзасидан вазифаларни белгилаб беришди.
