Ўтган ҳафта нафас йўллари инфекцияси билан касалхонага ётқизилган Папа Франциск тест натижалари «мураккаб клиник картина»ни кўрсатганидан кейин касалхонада қоладиган бўлди, деб ёзмоқда New York Times Ватиканнинг баёнотига таяниб.
Ватиканнинг аниқлик киритишича, 88 ёшли понтификда нафас йўлларининг полимикроб инфекцияси бор, бу эса унинг даволанишини модификациялашни талаб қилган.
AP хабарига кўра, понтифик жума куни бронхит хуружидан сўнг «қониқарли» ҳолатда Римдаги Агостино Жемелли университети клиникасига ётқизилган. Кейинги кунларда унинг иситмаси пасайиб, аҳволи барқарорлашган.
Ватикан матбуот котиби Маттео Брунининг айтишича, понтифик душанба куни эрталаб «яхши кайфиятда» бўлган: у дам олган, нонушта қилган ва кундалик газеталарни ўқиган.
Францискнинг шифохонага ётқизилиши муносабати билан Ватикан жорий ойда Рим папаси ташриф буюриши керак бўлган бир қатор тадбирларни, жумладан, 19 февралдаги анъанавий умумий қабулни бекор қилди.
Аргентиналик понтифик қарийб 12 йилдан буён Рим-католик черковига раҳбарлик қилиб келмоқда. Ёшлигида у касалликдан сўнг ўпкасининг бир қисмини олдириб ташлаган, шунинг учун у тез-тез нафас йўллари касалликлари хуружидан азият чекади, дея таъкидлайди AP. Францискнинг тиззасида ҳам муаммолар бор, шу сабабли у сўнгги йилларда ногиронлик аравачаси ва ҳассадан фойдаланади.
2023 йил март ойида Францискка пневмония ташхиси қўйилган, аммо ўшанда у уч кундан кейин касалхонадан чиққанди.
