17 февраль куни Facebook`даги «ТЧСЖ и как с ним жить?» (ХУЖМШ ва у билан қандай яшаш керак?) гуруҳида Тошкент шаҳри Миробод тумани ҳокимлиги мансабдори ва аёл ўртасидаги можаро акс фото ва видеолар жойланди.
Хабар муаллифи З.Толипова хусусий уй-жой мулкдорлари ширкати (ХУЖМШ) раиси сифатида уй-жой коммунал хизмат бўлими бошлиғи Отабек Атоев томонидан ҳокимликка чақирилгани ҳақида ёзган.
Ҳодиса жойида ҳокимлик вакили раисга фуқаро унинг устидан шикоят қилганини айтган. Шундан сўнг вазиятни муҳокама қилиш пайтида жанжал келиб чиққан ва оқибатда аёл ходимнинг мулоқот қилиш услубидан норози бўлиб, хонадан чиқиб кетган.
Постда таъкидланишича, коридорда ХУЖМШ раиси уй аҳлининг Telegram канали учун жонли эфир қила бошлаган. Шу пайт, унинг сўзларига кўра, Отабек Атоев хонадан отилиб чиқиб, аёлнинг қўлидаги телефонини тортиб олган ва унга ташланган — аёлни стол устига йиқитиб, кофтасини йиртган ва қўлларини тирнаган. Аёлнинг қичқириғидан сўнг ҳокимлик ходимлари югуриб келган ва ҳамкасбини ундан ажратган.
Пост муаллифи томонидан эълон қилинган видеоларнинг бирида ҳужум содир бўлган пайт акс этган бўлса, бошқасида ҳодисадан сўнг шокка тушган аёлнинг йиғиси эшитилади.
Кейинчалик ХУЖМШ раисига ёрдам бериш учун у бошқарган «дом» фуқароларидан бири етиб келган, бироқ аёлнинг сўзларига кўра, Отабек Атоев у билан ҳам ўзини номақбул тутган. Видеода эркак мансабдорга фуқаролар давлат хизматчилари ўз хизмат вазифаларини бажараётган вақтда уларнинг розилигини сўрамасдан тасвирга олиш ҳуқуқига эга эканини тушунтираётгани эшитилади. Амалдор эса бу нотўғри маълумот эканини айтади.
Музокара ҳокимликнинг кадрлар бўлими бошлиғи иштирокида давом этган, бироқ Толипованинг айтишича, Атоев айбини тан олмаган.
«Биринчи мартда пост ёзишим, чунки ҳар доим барча муаммоларни музокаралар орқали ҳал қилардим. Аммо бу вазиятдан жуда жаҳлим чиқди. Мен жанжалдан сўнг ҳолимни йўқотдим […] Унинг қўпол ҳаракатлари сабаб бутун танам ва бошим оғрияпти, ишчанлигимни ҳам деярли йўқотдим. Давлат идораси ходими қандай қилиб аёл кишига қўл кўтариши мумкин? Унга давлат идорасида, айниқса, аҳоли билан ишлайдиган идорада жой йўқ, деб ўйлайман», — деб ёзади муаллиф хулосасида.
Миробод тумани ҳокимлиги ҳолат юзасидан муносабат билдирди. Ҳокимлик маълумотларига кўра, ХУЖМШ раиси президентнинг 5152- сонли қарори ва кўп қаватли уйларни бошқариш тўғрисидаги ҳукумат қарори ижросини таъминлаш мақсадида чақирилган.
Ҳокимликнинг қайд этишича, кўп квартирали уйларда авария вазиятларини бартараф этадиган, 24 соат мобайнида фаолият юритадиган авария-диспетчерлик хизмати ташкил этилгани тўғрисида савол-жавоб бўлган вақтда Атоев ва Толипова ўртасида «оғзаки низо» келиб чиққан.
«Айни вақтда ҳолат юзасидан О.Атоев ҳамда З.Толипова билан тегишли масъуллар иштирокида ўрнатилган тартибда суҳбат ўтказилди», — дейилади хабарда.
Ҳокимлик Толиповага нисбатан куч ишлатилганига изоҳ бермади.
