Украина президенти Владимир Зеленский 19 февраль куни бўлиб ўтган матбуот анжуманида Украинада президентлик сайловларини ўтказишга чақирган АҚШ президенти Дональд Трампга жавоб қайтарди.
«Агар кимдир мени ҳозироқ ўзгартирмоқчи бўлса, у ҳолда ҳозироқ бунинг иложи йўқ», — деди Зеленский.
Зеленский, шунингдек, АҚШ президенти Россиянинг дезинформация пуфагида қолиб кетганини айтди, деб таъкидлади Reuters. Украина етакчисининг айтишича, Трампнинг унинг рейтинги бор-йўғи 4 фоиз экани ҳақидаги баёноти Россиянинг дезинформацияси бўлиб, унинг ўрнини эгаллашга бўлган ҳар қандай уриниш муваффақиятсизликка учрайди.
«Биз буни тушунамиз ва бизда бу рақамлар Америка ва Россия ўртасида муҳокама қилинаётгани ҳақида далиллар бор. Яъни, президент Трамп, афсуски, бу дезинформация майдонида яшаяпти», — деди Зеленский.
Украина президенти Трамп маъмуриятини Россияга нисбатан «сиёсатни юмшатиш»да айблаб, урушни «ҳудудий яхлитликнинг бузилиши» ва «конфликт» деб атади. Зеленскийнинг айтишича, Украина урушни уруш деб аташ учун «ҳамма нарсани қилмоқда», деб ёзди «Суспiльне».
Зеленский, шунингдек, матбуот анжуманида АҚШ Украинага 67 миллиард долларлик қурол-яроғ ва 31,5 миллиард долларлик бюджет ёрдами берганини, Американинг 500 миллиард долларлик фойдали қазилмалар бўйича талаблари «жиддий суҳбат эмаслиги»ни ва у ўз мамлакатини сота олмаслигини айтди.
Киев халқаро социология институтининг 19 февраль куни маълум қилишича, 4−9 февраль кунлари ўтказилган сўров натижаларига кўра, украиналикларнинг 37 фоизи эмас, балки 57 фоизи Владимир Зеленскийга ишонади.
- Бир ойдан камроқ вақт ўтгач, Трамп АҚШнинг Украина ва Россияга нисбатан сиёсатини ўзгартирди ва Вашингтоннинг Россияни изоляция қилиш ҳаракатини Трамп-Путин телефон суҳбати ва АҚШ ва Россия юқори мартабали амалдорлари ўртасидаги музокаралар билан якунлади.
- У 18 февраль куни Зеленскийнинг қўллаб-қувватланиш рейтинги 4 фоиз эканини билдирган ва уни танқид қилганди. Трамп, шунингдек, кенг кўламли Россия-Украина уруши бошлангани учун жавобгарликни Украинага юклаган ва мамлакатда президентлиги учун янги сайловлар ўтказишга чақирганди.
