АҚШ президенти Дональд Трамп Украина президенти Владимир Зеленскийни яна бир бор танқид қилди. Унинг фикрича, Зеленский АҚШни «ғалаба қозониб бўлмайдиган ва бошланиши керак бўлмаган» урушга 350 миллиард доллар сарфлашга «кўндирган».
Трампнинг айтишича, АҚШ Украинани қўллаб-қувватлаш учун Европадан кўра 200 миллиард кўпроқ маблағ сарфлаган, аммо эвазига ҳеч нарса олмайди. Унинг қайд этишича, АҚШнинг аввалги президенти Жо Байден бу борада «мувозанатни сақлаш»ни талаб қилмаган.
АҚШ президенти, шунингдек, Зеленскийни «кичиккина муваффақиятга эришган комедиячи» деб атади.
«Ахир бу уруш биздан кўра Европа учун муҳимроқ — бизда тўсиқ сифатида улкан ажойиб океан бор. Бундан ташқари, Зеленский биз унга юборган пулларнинг ярми „йўқолганини“ тан олади. У сайлов ўтказишдан бош тортмоқда, унинг украиналиклар орасида рейтинги жуда паст ва у уддалаган ягона нарсаси — „Байденни скрипка чалгандек чалиш“. Сайловларсиз диктатор, Зеленский шошилгани маъқул, акс ҳолда, унинг мамлакати омон қолмайди. Айни пайтда биз Россия билан урушни тугатиш бўйича музокараларни муваффақиятли олиб бормоқдамиз ва буни фақат Трамп ва Трамп маъмурияти қила олишини ҳамма тан олади. Байден ҳеч қачон уриниб кўрмаган, Европа тинчликка эриша олмаган, Зеленский эса „молиявий оқим“ давом этишини хоҳлаётган бўлиши мумкин. Мен Украинани яхши кўраман, лекин Зеленский буни яхши уддалай олмади, унинг мамлакати вайрон бўлди ва миллионлаб одамлар беҳуда ҳалок бўлди — бу давом этмоқда», — деб ёзди Трамп TruthSocial ижтимоий тармоғида.
Бир кун аввал Трамп Владимир Зеленский АҚШни Киевни Саудия Арабистонидаги Россия-Америка музокараларига қўймагани учун танқид қилганидан кейин Украинада президентлик сайловларини ўтказишга чақирганди. «Бизда Украинада сайловлар ўтказилмаган, амалда Украинада ҳарбий ҳолат ҳукм сурган вазият юзага келди. Украина етакчисини — менга бу ҳақда гапириш ёқимсиз — қўллаб-қувватлаш рейтинги 4% ни ташкил қилмоқда. Мамлакат парчаланиб кетган, шаҳарларнинг аксарияти вайрон бўлган. Бинолар вайрон бўлган. Бу сносга тушган улкан майдонга ўхшайди», — деб айтган Трамп.
Бунга жавобан Зеленский шундай деди: «Агар кимдир мени ҳозироқ алмаштирмоқчи бўлса, унда бунинг ҳозироқ иложи йўқ». Унинг қўшимча қилишича, Трампнинг ишонч рейтинги 4 фоизга баҳолангани ҳақидаги сўзлари Россиядан олинган маълумотларга асосланган.
АҚШ вице-президенти Жей Ди Вэнс Украина етакчиси Владимир Зеленскийнинг америкалик ҳамкасби Трампга нисбатан танқидини янги маъмурият билан «жирканч мулоқот усули» деб атади. Унинг фикрича, агар Зеленский Трампни омма олдида танқид қилишни бошлаш орқали унинг фикрини ўзгартиришга қарор қилган бўлса, у аслида «ёмон маслаҳатлар»ни эшитган. «Биз, албатта, Украина халқини яхши кўрамиз. Аскарларнинг жасоратига қойил қоламиз, лекин, албатта, бу урушга тезроқ барҳам бериш керак, деб ҳисоблаймиз. Бу — АҚШ президентининг сиёсати. У Россия дезинформациясига асосланмаган. У Дональд Трамп, менимча, геосиёсат ҳақида кўп нарсани билиши ва узоқ вақтдан бери қатъий нуқтаи назарга эга эканига асосланади», — деди Вэнс.
