Европа АҚШ ёрдамисиз ўзини ҳимоя қилиши учун мудофаа инвестицияларига ҳар йили 250 миллиард евро (261,6 миллиард доллар) атрофида маблағ сарфлаши керак, бу блокнинг иқтисодий қудратини ҳисобга олган ҳолда кўтара оладиган маблағдир. Бу ҳақда Reuters «Брюгель» тадқиқот институти ва Киль жаҳон иқтисодиёти институтига таяниб хабар берди.
Европа Иттифоқи ялпи ички маҳсулотининг 1,5 фоизига тенг бўлган бу харажат Европага ўзини Россиядан ҳимоя қилиш учун 300 мингга яқин аскарни сафарбар қилиш имконини беради.
Тадқиқотда, шунингдек, Европанинг молиявий имкониятларига қарамай, қитъада мудофаани мувофиқлаштириш миллий қуролли кучлар учун асосий муаммо бўлиб қолаётгани таъкидланди, яқинроқ мувофиқлаштириш ва қўшма харидларни амалга оширишга чақирилди.
Европанинг аксарият давлатлари АҚШ президенти Дональд Трампнинг босими остида қолмоқда, АҚШ мудофаа вазири Пит Ҳегсет ўтган ҳафта Европани Америкага «сўрувчи» сифатида муносабатда бўлишдан огоҳлантириб, унинг ўз мудофааси учун масъул экани ҳақида гапирганди.
Германиянинг бўлажак канцлери сифатида кўрилаётган Фридрих Мерц пайшанба куни Вашингтоннинг НАТОдаги келажакдаги иштирокига шубҳа билдирди, АҚШ миллий хавфсизлик бўйича маслаҳатчиси Майк Вальс эса НАТОнинг барча аъзолари мудофаа харажатлари бўйича ялпи ички маҳсулотнинг 2 фоизи миқдоридаги мақсадли кўрсаткични тўлиқ бажариши кераклигини билдирди.
«Брюгель» ва Киль тадқиқоти Европа мудофаа харажатларини ҳозирги 2 фоиздан йилига ялпи ички маҳсулотнинг 4 фоизигача оширишни таклиф қилади. Унинг ярми умумий Европа қарзи ҳисобидан молиялаштирилиши ва қўшма харидлар учун ишлатилиши, қолган қисми эса миллий даражада қопланиши мумкин, дейди муаллифлар.
Тадқиқотда қайд этилишича, Москва Украинадаги урушдан кейин ҳарбий салоҳиятини сезиларли даражада оширган, бунга Украинада 700 мингга яқин аскар сафарбар этилгани, шунингдек, танклар ва зирҳли техникалар ишлаб чиқариш кескин ошгани сабаб қилиб кўрсатилган.
Бу 50 та қўшимча бригада учун Европага 1400 та янги жанговар танк ва 2000 та пиёда жанговар машина керак бўлишини кўрсатди, бу миқдор бутун Германия, Франция, Италия ва Британия қуруқлик кучларининг ҳозирги захираларидан ошиб кетади.
«Иқтисодий жиҳатдан буни уддалаш мумкин… Бу, масалан, ковид пандемияси даврида инқирозни енгиш учун сафарбар қилиниши керак бўлган миқдордан анча кам», — дейилади тадқиқотда.
