Божхона қўмитаси Ўзбекистонга мобил қурилмаларни олиб киришда божхона декларациясини тўлдириш бўйича онлайн хизматни ишга туширади. Бу ҳақда қўмита матбуот котиби Ҳусан Тангриев маълум қилди.
20 февраль куни тадбиркор Ойбек Шайхов Тошкент халқаро аэропортининг учиб келиш залида мобил қурилмаларни UzIMEI тизимида рўйхатдан ўтказишда навбатлар юзага келгани ҳақида пост қолдирди.
«Ҳозирда бу жараён мажбурий бўлиб, икки босқичда амалга оширилади (божхона + UzIMEI), лекин рўйхатдан ўтиш учун божхона ҳудудида атиги битта ходим ишлаяпти. Иккинчи ходим ҳам борга ўхшади, лекин у ёрдам беришга «ҳуқуқи йўқ»дек, чунки у «бошқа иш» — дафтарга ёзиш билан банд. Биз — йўловчилар ва пойтахт меҳмонлари бир соатдан буён навбатда турибмиз. Рейс 4:30 да келган, ҳозир эса 6:26. «Янги Ўзбекистонда» эски муаммолар қолиб кетган. Агар раҳбарият бунга эътибор қаратмаса, у шундайлигича қолиб кетади. Қанчадан-қанча одамнинг меҳнати кетган иш шундай бўлиб турса, уят», — деб ёзган у.
Мазкур масала бўйича қўмитанинг Божхона назорати ва расмийлаштирувини ташкил этиш ҳамда Ахборот технологиялари ва киберхавфсизликни таъминлаш бошқармалари, «Тошкент-Аэро» компанияси мутасаддилари вазиятни жойига чиққан ҳолда ўрганган. Жараёнга Телекоммуникациялар тармоқларини бошқариш республика маркази (тизим оператори) вакиллари ҳам жалб этилган.
Аввалроқ хабар берилганидек, Ўзбекистонга янги мобил қурилма олиб киришда божхона декларациясини тўлдириш мажбурий бўлади, акс ҳолда қурилмани UzIMEI тизимида рўйхатдан ўтказишда бож тўлашга тўғри келади. Агар базада маълумот бўлмаса, у ҳолда телефон божхона қийматининг 30 фоизи миқдорида бож тўлаш керак.
Ушбу декларация мобил қурилмаларни UzIMEI тизимида рўйхатдан ўтказишда асос ҳисобланади. Талаб 2024 йил бошида жорий қилинган. Божхона органлари ва UzIMEI октябрь ойида тизимларни интеграциялашни якунлаган.
Ҳусан Тангриев йўловчилар мобил қурилмаларни бевосита аэропортнинг ўзида рўйхатдан ўтказишлари мажбурий эмаслигини эслатиб ўтди. Аэропортнинг ўзида рўйхатга олиш ҳаво йўллари орқали ҳаракатланаётганларга қулайлик яратиш мақсадида йўлга қўйилган.
Қурилмалар олиб келинганда тўлдирилган йўловчи божхона декларацияси асосида йўловчилар уларни Ўзбекистонга кириб келганларидан сўнг 30 кун, чет элликлар эса 60 кун давомида ўзларига қулай фурсатда UzIMEI тизимида рўйхатдан ўтказишлари мумкин, дея таъкидлади у.
Қўмита матбуот котибининг сўзларига кўра, рўйхатдан ўтказиш жараёнини тезлаштириш бўйича бир қатор ишлар амалга оширилган:
- навбатларнинг олдини олиш мақсадида ходимлар ва операторлар сони оширилган;
- қўмита маълумотлар базаси ва UzIMEI тизими интеграциясида янада тезлашувга эришилган.
Келгусида йўловчи божхона декларациясини онлайн тўлдиришни йўлга қўйиш, бунинг учун мобил иловалар ишлаб чиқиш устида ҳам ишлар бошлаб юборилган, дейилади хабарда.
Бундан ташқари, яқин кунларда декларацияни онлайн тўлдириш тест режимида ишга туширилади, халқаро аэропортларнинг учиб келиш залларига декларацияни онлайн тўлдиришга мўлжалланган инфокиосклар ўрнатилиши режалаштирилмоқда.
