21 февраль куни соат 22:02 да Тошкент шаҳри Яшнобод тумани Авиасозлар 4-даҳасида жойлашган автомобиллар ювиш жойида ёнғин содир бўлди, дея хабар бермоқда шаҳар ФВБ матбуот хизмати.
Қайд этилишича, ёнғин-қутқарув экипажлари манзилга соат 22:14 да етиб борган. Ёнғин соат 22:27 да қуршаб олиниб, соат 22:33 да ўчирилган.
Ёнғин оқибатида тан жароҳати олган ва вафот этган фуқаролар йўқ. Ёнғин сабаби ва моддий зарарига аниқлик киритиш ишлари бошланган.
Тармоқларда тарқалган видеоларда ёнғин ерусти метро йўлининг тагида бўлганини кўриш мумкин.
Метрополитен матбуот хизмати ёнғин «Технопарк» — «Яшнобод» бекатлари оралиғига яқин бўлган ҳудудда бўлганини айтиб, метро ҳаракатига ҳеч қандай таъсир кўрсатмагани ва йўналишдаги поездлар ҳаракати белгиланган жадвал асосида ташкиллаштирилганини маълум қилди.
