23 февраль куни Германия бундестагига муддатидан олдин ўтказилган сайловларда консерватив блок — Фридрих Мерц бошчилигидаги Христиан-демократик иттифоқи ва Христиан-социал иттифоқ (ХДИ/ХСИ) етакчилик қилмоқда, дея хабар берди ARD ва ZDF сайлов участкаларидан чиқишда ўтказилган сўров натижаларига таяниб.
ARD маълумотларига кўра, блок учун сайловчиларнинг 28,9 фоизи, ZDF маълумотларига кўра, 28,6 фоизи овоз берган.
Иккинчи ўринда ГФРнинг урушдан кейинги тарихида биринчи марта «Германия учун альтернатива» (AfD) ўта ўнг партияси бормоқда, унинг кўрсаткичи 19,7 фоиздан 20,1 фоизгача.
Экзит-полга кўра, парламентга Олаф Шольцнинг Социал-демократик партияси (СДП, 16,1 фоиздан 16,3 фоизгача), шунингдек, Яшиллар (12,4 фоиздан 13,2 фоизгача) ва Сўл партия (8,6 фоиздан 8,9 фоизгача) ўтди.
Парламентга кириш учун партиялар 5 фоиздан ортиқ овоз тўплаши керак. Сайловларда умумий вазият қуйидагича:
ARD инфографикаси.
ZDF инфографикаси.
Ўз навбатида, «Германия учун альтернатива» Шарқий Германияда қолган партиялардан ўзиб кетиб, 25 фоиздан ортиқ овоз олди, деб хабар бермоқда ARD телеканали.
Германия бундестагига сайловларда иштирок этиш рекорд даражадаги 83 фоизни ташкил этди, деб ёзади ZDF.
Тарихан шундай бўлиб келганки, экзит-пол натижалари нисбатан аниқ ва овоз бериш тугаганидан кейинги соатларда прогнозлар одатда унчалик ўзгармайди, деб таъкидлади Bloomberg. Овоз беришнинг дастлабки натижалари 24 февраль куни маълум бўлади.
Ҳеч қайси партиядан мутлақ кўпчилик йўқлиги сабабли энг кўп овоз олган ва ҳукумат коалициясида етакчилик қилган партия раҳбари канцлер бўлади. Сайлов натижаларига кўра, Христиан-демократлар партияси Бундестагдаги 630 ўриндан 186 тасини, «Германия учун альтернатива» эса 131 ўринни эгаллаши мумкин, дейилади маълумотларда.
2021 йилги сайлов натижалари билан таққослаганда, AfD ўз натижасини икки бараварга оширди ва Олаф Шольцнинг СДПси ўз тарихида биринчи марта бундестагда учинчи энг кучли партияга айланиши мумкин. Шольц партияси ўз фаолияти давомида энг ёмон натижани кўрсатди.
Фридрих Мерц, Христиан-демократик иттифоқи етакчиси, канцлерликка номзод:
Бу сайловларда биз ғалаба қозондик. Ташқи дунё бизни кутмаяпти, узоқ коалиция учрашувлари ва музокаралар ҳам кутгани йўқ… Энди биз тезда ҳаракат қилиш қобилиятимизни тиклашимиз керак, шунда биз ўз уйимизда тўғри ишларни қила оламиз, Европада яна мавжуд бўламиз ва бутун дунё Германия ишончли тарзда бошқарилаётганини тушунади.
Алис Вайдель, AfD етакчиси:
Бу биз учун тарихий ютуқ, эришган энг яхши натижамиз бўлди.
Биз мамлакатимиз учун сиёсат юритмоқчимиз. Биз Христиан иттифоқи билан коалиция музокараларига розимиз. Бу йўналишда у партия ҳам буни тан олиши керак. Акс ҳолда, Германияда ҳеч қандай сиёсий ўзгариш бўлиши мумкин эмас.
Олаф Шольц эса сайловлардаги мағлубиятини тан олиб, натижани социал-демократлар учун аччиқ деб атади.
