Бош вазир Биньямин Нетаньяҳу идорасининг 23 февраль куни берган баёнотига кўра, Исроил 620 нафар фаластинлик маҳбус ва ушлаб турилганларни озод қилишни «навбатдаги гаровга олинганларни қўйиб юбориш ва таҳқирловчи маросимларсиз» топшириш кафолатланмагунча кечиктирди. Бу ҳақда The Times of Israel ёзмоқда.
Бу ҲАМАС томонидан яқинда ўтказилган топширишларга ишора бўлиб, БМТ расмийлари ҳам бунинг ҳурматсизлик ва халқаро ҳуқуққа зид эканини билдирди, деб таъкидлади Reuters. Жумладан, шанба куни озод қилинган олти нафар гаровга олинганлардан беш нафари ниқобли, қуролланган ҲАМАС аъзолари томонидан оломон олдида кузатиб борилган — бу картина БМТ ва Қизил Хоч томонидан шафқатсиз деб танқид қилинди.
ҲАМАС гаровга олинганларни одамлар олдида саҳнага чиқаради ва баъзан уларга топширилишдан олдин нутқ сўзлатади. Шунингдек, гаровга олинганларнинг жасади солинган тобутлар ҳам оломон орасидан олиб ўтилган.
Юқорида келтирилган 6 киши ўт очишни тўхтатишнинг биринчи босқичи остида озод этилиши кутилаётган сўнгги тирик гаровга олинганлардир. Иккинчи босқич бўйича музокаралар ҳали бошланмаган.
ҲАМАС Исроилни ўт очишни тўхтатиш келишувини бузганликда, матбуот котиби Абдуллатиф Ал-Қану эса Нетаньяҳуни жараённи «қасддан тўхтатишда» айблади.
Исроил ва ҲАМАС 19 январда ўт очишни тўхтатиш режими бошланганидан бери бир-бирини қоидабузарликларда тез-тез айблаб келмоқда, аммо у ҳозиргача давом этмоқда.
Шири Бибас ҳақида икки оғиз сўз
ҲАМАС 20 февраль куни илк бор гаровга олинганларнинг жасадларини Исроилга топширишни бошлаганди. Ўша куни гуруҳ гаровга олинган тўрт кишининг жасадини Исроилга қайтаргани айтилди: Шири Бибас (аёл), унинг икки ўғли Ариэль ва Кфир, шунингдек, 83 ёшли Одед Лифшиц. Уларнинг барчаси 2023 йил 7 октябрь куни ҳужумлар пайтида Нир-Оз кибуцидан ўғирлаб кетилгани айтилади. Болаларнинг отаси Ярден Бибас ҳам ўша куни ўғирлаб кетилган, лекин оила аъзоларидан алоҳида ушлаб турилган ва 2025 йил февралида озодликка чиққан.
Шири Бибас ва унинг фарзанлари.
Фото: Flash90
Аммо ДНК таҳлили шуни тасдиқладики, гуруҳ Шири Бибаснинг эмас, умуман бошқа бир аёлнинг жасадини топширган. Шундан сўнг ҲАМАС бу бир чалкашлик экани, икки бола ва она Исроил авиазарбаси оқибатида ҳалок бўлгани, Шири Бибаснинг жасади таниб бўлмас ҳолга келиб қолгани учун бундай адашиш юз берганини таъкидлади. Бир кун ўтиб, гуруҳ Бибаснинг ҳақиқий жасадини Исроилга топширди.
Исроил оиланинг ўлимига оид талқинни рад этди, хусусан, расмийларнинг фикрича, у Ғазода ўғиллари билан бирга «шафқатсизларча» ўлдирилган.
