Ватикан шанба куни Рим папаси Францискнинг соғлиғи сўнгги 24 соат ичида ёмонлашганини айтди ва биринчи марта унинг аҳволини «оғир» деб таърифлаб, унга қўшимча кислород ва қон қуйиш керак бўлганини маълум қилди. Шунингдек, тестлар унда тромбоцитлар кўрсаткичи пастлигини кўрсатди.
Рим папаси бир неча кун давомида нафас олиши қийинлашгандан сўнг 14 февралда Римнинг Жемелли касалхонасига ётқизилган, шундан сўнг унга иккала ўпкада пневмония ташхиси қўйилган.
Баёнотда айтилишича, 88 ёшли Франциск эрталаб «узоқ давом этган астмага ўхшаш нафас олиш муаммолари»дан азият чеккан, бу эса «юқори оқимли кислород» юборишни талаб қилган.
«Авлиё отанинг аҳволи оғирлигича қолмоқда. Папанинг ҳаёти хавф остида», — дейилади хабарда. «Авлиё ота ҳушида ва кечагидан кўра кўпроқ ноқулайликларни бошдан кечираётган бўлса-да, кунни креслода ўтказди», — деб қўшимча қилди Ватикан.
Аввалроқ Францискнинг шифохонага ётқизилиши муносабати билан Ватикан жорий ойда Рим папаси ташриф буюриши керак бўлган бир қатор тадбирларни, жумладан, 19 февралдаги анъанавий умумий қабулни бекор қилгани хабар қилинганди. У кетма-кет иккинчи ҳафта ушбу тадбирни ўтказиб юборадиган бўлди.
Папага қўйилган ташхиc — қўш пневмония жиддий инфекция бўлиб, иккала ўпкани яллиғлантириши мумкин, бу эса нафас олишни қийинлаштиради. Ватикан папанинг инфекциясини «мураккаб» деб таърифлаб, уни икки ёки ундан ортиқ микроорганизмлар келтириб чиқараётганини айтди, дейилади Reuters хабарида.
Шифохона ходимларидан бири ўпка инфекцияси унинг қонига тарқалиб, сепсисга айланиши хавфи борлигини айтди, буни «енгиш жуда қийин бўлиши мумкин».
Аргентиналик понтифик қарийб 12 йилдан буён Рим-католик черковига раҳбарлик қилиб келмоқда. Ёшлигида у касалликдан сўнг ўпкасининг бир қисмини олдириб ташлаган, шунинг учун у тез-тез нафас йўллари касалликлари хуружидан азият чекади, дея таъкидлайди AP. Францискнинг тиззасида ҳам муаммолар бор, шу сабабли у сўнгги йилларда ногиронлик аравачаси ва ҳассадан фойдаланади.
2023 йил март ойида Францискка пневмония ташхиси қўйилган, аммо ўшанда у уч кундан кейин касалхонадан чиққанди.
