Ўзбекистонлик ҳимоячи Абдуқодир Ҳусанов фаолият олиб борадиган «Манчестер Сити» клуби Англия Премер лигасининг 26-турида «Ливерпуль»га имкониятни бой бериб қўйди. 23 февраль куни бўлиб ўтган учрашув 0:2 ҳисобида якунланди.
«Сити» бош мураббийи Пеп Гвардиола жамоа бош ҳужумчиси Эрлинг Холанднинг жароҳати сабаб ҳужум марказида Фил Фоден ва Омар Мармушга таянмоқда. Мадриднинг «Реал» клубига қарши ўйинда ўнг қанот ҳимоясида ўйнаган Абдуқодир Ҳусанов ҳимоя марказига Натан Аке билан бирга қайтди.
«Қизиллар» мураббийи Арне Слот Собослаи ва Кертис Жонсни «ёлғон тўққизлик» сифатида ишлатиб, кўзгу каби жавоб берди.
Иккала жамоа ҳам 4−2−4 схемасида ўйнади, аммо прессинг ва вазиятларни амалга оширишда айнан «Ливерпуль» устунлик қилди.
14-дақиқада бурчак тўпини ноодатий тарзда амалга оширилиши эвазига қанот ҳужумчиси Муҳаммад Салоҳ гол урди, кейинроқ у ҳам голли узатмани амалга оширди. Эндиликда 32 ёшли мисрлик ҳисобида Англия чемпионатининг жорий мавсумида 25 гол ва 16 голли узатма мавжуд (38 ўйинда жами 30 гол ва 21 голли узатма). Бу орқали у самарали ҳаракатлар бўйича бир нечта рекордларни янгилади.
Баҳснинг иккинчи голини ярим ҳимоячи Доминик Собослаи киритди, Абдуқодир Ҳусанов унга ҳалал бера олмади.
Ушбу ғалаба эвазига «Ливерпуль» ортда бораётган «Арсенал»дан 11 очкога ўзиб кетди, «Арсенал» эса аввалги турда «Вест Ҳем»га мағлуб бўлганди.
Пеп Гвардиола Ҳусановни ўйин учун мақтади.
«[Ҳусанов] Мадридда жуда яхши ўйнади, ўнг қанот ҳимоясида ўйнади ва Винисиусни назорат қилди, бугун ҳам у жуда тезкор ва интизомли ўйнади. Албатта, у ўз устида ишлаши керак ва у ақл бовар қилмайдиган қобилиятга эга. Нико [Гонсалес] ва Умар [Мармуш] ҳам, лекин уларга жисмонан кучли жамоага қарши осон эмас», — деди мураббий.
Ўзбекистонлик ҳимоячи мағлубиятга қарамай, бир неча бор жамоасини қутқариб қолди. Бир вазиятда Салоҳ «шаҳарликлар» ҳимоячиси Натан Акедан қочиб кетди, аммо Абдуқодир Ҳусанов шеригини суғурта қилдириб, унинг зарбасини қайтаришга муваффақ бўлди.
Яна бир вазиятда Ҳусанов офсайд чизиғини ушлагани учун Кёртис Жонснинг учинчи голи бекор қилинди.
Учрашув сўнгида Абдуқодир Собослаининг голга айланиши мумкин бўлган зарбасини қайтариб қолди.
Ҳусановнинг «Ливерпуль»га қарши статистикаси:
- 102 та тўпга тегиш;
- 87 та аниқ узатма (энг яхши кўрсаткич);
- 99 фоиз узатмалар аниқлиги (энг юқори);
- 12 та тўп олиб қўйиш;
- ҳужум зонасига 9 та узатма;
- 6 марта тўпни узоқлаштириш;
- ерда 2 та яккама-якка курашда ғалаба;
- 1 та зарбага блок;
- сўнгги ҳимоячининг 1 та қутқарув подкати;
- 100 фоиз подкатлар муваффақияти;
- 1 та голли имконият яратиш.
Бундан ташқари, ҳеч бир футболчи бу ҳафта АПЛда Ҳусановдан (12) кўп тўпни олиб қўймади.
Тур якунларига кўра, «Ливерпуль» бир ўйин кўп ўтказиб, 64 очко билан пешқадамлик қилмоқда. Иккинчи ўринда «Арсенал» (53), учинчи ўринда «Ноттингем Форест» (47), тўртинчи ўринда «Манчестер Сити» жойлашган.
Видео
Видео Setanta Sports Premier League YouTube каналидан олинди.
Эслатиб ўтамиз, 20 ёшли Абдуқодир Ҳусанов январь ойида Франциянинг «Ланс» клубидан «Манчестер Сити»га ўтган ва инглиз клуби билан 2029 йилгача мўлжалланган шартнома имзолаганди.
Аввалроқ «Газета.uz» Ҳусанов билан 2024 йилнинг ёзида Ўзбекистон терма жамоасининг Париж Олимпиадасигача бўлган йўли ҳақида ҳужжатли фильм устида ишлаётганда ёзиб олинган интервьюни, шунингдек, унинг агенти билан интервьюни эълон қилган эди.
