Фарғона вилёати Бағдод туманида автомобиль йўлининг бир қисми ўпирилиб тушди. Вилоят ФВБ ҳолат юзасидан маълумот берди.
Маълум қилинишича, 23 февраль кунидан 24 февраль кунига ўтар кечаси Фарғона ҳалқа автомобиль йўлининг 286-километрида йўл қопламаси чўкиб қолган.
Бунга йўлнинг ўнг томонидан оқиб ўтувчи Фарғона каналида сув сатҳи кўпайиб, автомобиль йўлининг таг қисмидан сизиб ўтиши сабаб бўлган.
Ҳозирги вақтда мазкур автомобиль йўлининг Қўқон-Фарғона йўналиши бўйича 285 километр ва Фарғона-Қўқон йўналишининг 288 километрларидан вақтинчалик ҳаракат чекланган.
Туманнинг 40 В 047 Бағдод-Дашт-Утарма (Қўқон-Фарғона) ва 40 В 046 Янгиқўрғон-Утарма-Қақир (Фарғона-Қўқон) автомобиль йўллари орқали ҳаракат ташкил этилган ва йўл чўккан қисмида таъмирлаш ишлари олиб борилмоқда.
Мазкур автомобиль йўли 2024 йил август ойида жорий таъмирланган. Транспорт воситаси ҳаракат жадаллиги суткасига 30 000−35 000 ташкил этади, ҳаракат вақтинча тўхтатилиб, ташкил этилган автомобиль йўлларининг 25 километрга узайган.
Фарғона вилояти Автомобиль йўллари бош бошқармаси берган маълумотига кўра, 24 февраль куни соат 18:00 га қадар автомобиль йўлида таъмирлаш ишлари якунланиб транспорт воситаларининг ҳаракати йўлга қўйилиши режалаштирилган.
