Ўзбекистонлик профессионал боксчи Исроил Мадримов (10−2−1, 7 КО) америкалик енгилмас спортчи кичик Вержил Ортисга (23−0, 21 КО) қарши жангдаги мағлубиятини изоҳлади.
Эслатиб ўтамиз, жанг 23 февралга ўтар кечаси Ар-Риёдда (Саудия Арабистони) бўлиб ўтган бокс оқшоми доирасида бўлиб ўтди ва ҳакамларнинг якдил қарори (115−113, 115−113, 117−111) билан Ортиснинг ғалабаси билан якунланди.
«Тўғрисини айтсам, биз бу жангга тайёргарлик кўргандик, аммо 100 фоиз тайёр эмасдик. Жанг бўладиган декабрь ойида вирусли касалликка чалиндим. Лекин тузалиб кетмаган эканман. Бу ҳақда АҚШга келганимизда билдик. Жангдан икки ҳафта олдин шифокор энди машғулотларга киришишим мумкинлигини айтди. Биз жангни бекор қилмоқчи эмасдик. 12 раунд бокс туша олдим, менимча, ёмон чиқмади. Бу ҳам тажриба», — деди у Ўзбекистон бокс федерацияси томонидан эълон қилинган интервьюда.
Boxing News нашрига берган интервьюсида у Артур Беттербиев — Дмитрий Бивол 2 ўртасидаги катта бокс оқшомининг бир қисми бўлгани учун жангни бекор қилишни истамаганини таъкидлади. Саудия Арабистонида Бивол Бетербиевдан реванш олиб, ярим оғир вазн тоифасида янги мутлақ жаҳон чемпионига айланганини таъкидлади.
«Декабрь ойида касал бўлиб қолдим. Икки ҳафта олдин шифокорга бордик ва у менинг жангга тайёр эмаслигимни айтди. Биз жангни бекор қилмоқчи эмасдик, чунки у катта бокс кечасининг бир қисми эди. Мен томошабоп жанг кўрсатмоқчи эдим, бу менинг ишим», — деди Мадримов интервьюда.
Ўзбекистонлик боксчи дастлабки олти раундда жуда кўп ҳаракат қилганидан афсусда эканини билдирди. Кўп ҳаракат жанг охирида уни ҳолдан тойдирди ва Ортиснинг фойдасига ишлади. Зарбалар кучи бўйича Мадримов рақибидан устун эди, аммо оёқларда ҳаддан ташқари фаоллик унинг кучини йўқотди.
«Мен таваккал қилдим, чунки жангни бекор қилишни хоҳламадим. Бу муҳим тажриба эди. Энди навбатдаги жангни кутаман ва кучлироқ бўлиб қайтаман», — дея қўшимча қилди Мадримов.
Дастлаб Исроилнинг рақиби Сергей Богачук (24−2) бўлиши керак эди. 2024 йил август ойида Ортис айнан уни тўхтатди. Улар 21 декабрь куни Александр Усик ва Тайсон Фюри байроқдорлари бўлган турнирнинг андеркардида тўқнаш келишлари керак эди. Аммо Мадримов ўткир бронхит касаллиги туфайли жангдан воз кечди.
Мадримов Осиё ўйинлари совриндори ва ҳаваскорлар ўртасида Осиё чемпиони. У профессионал фаолиятини 2018 йилда АҚШнинг Atlantic City клубида бошлаган, у ерда бошқа ўзбекистонлик профлар Шаҳрам Ғиёсов ва Муроджон Аҳмадалиев муваффақиятли иштирок этган.
Ўтган йилнинг март ойида Ар-Риёдда у Магомед Қурбоновни (25−1, 13 КО) 5-раундда нокаут билан мағлуб этиб, биринчи ўрта вазн тоифасида WBA чемпионига айланди.
Бироқ, биринчи ўрта вазн тоифасида (69,9 кг гача) собиқ жаҳон чемпиони Мадримов учун Ортисдан мағлубият кетма-кет иккинчи мағлубият бўлди, у аввалги жангда икки карра мутлақ жаҳон чемпиони Теренс Кроуфордга ютқазган эди.
